Author: davidrg

Tónleikahelgin 6.-8. febrúar

Fimmtudagur 6. febrúar

Samstarfstónleikar tónlistarmanna frá Reykjavík og Denver verða haldnir í Iðnó. Tónlistarmennirnir para sig saman og flytja tónlist hvors annars í sameiningu og búa til tónlistarlegan bræðing úr þessum tveimur ólíku en að sama skapi tengdu tónlistarheimum. Íslensku tónlistarmennirnir sem koma fram eru hin þjóðþekktu Högni Egilsson (Hjaltalín & Gus Gus), Lay Low og Snorri Helgason en frá Denver koma þau Tyler Ludwick (Princess Music), Esmé Patterson (Paper Bird) og Jesse Elliott (Ark Life). Tónleikarnir hefjast klukkan 21:00 og aðgangur er ókeypis.

Blússveitin The Dirty Deal Blues Band kemur fram á Dillon. Tónleikarnir hefjast klukkan 22:00 og það er ókeypis inn.

Föstudagur 7. febrúar

Just Another Snake Cult stíga á stokk í menningarhúsinu Mengi við Óðinsgötu. Verkefnið var stofnað af Þóri Bogasyni árið 2010 sem spilar á ýmis hljóðfæri, semur tónlistina mestmegnis sjálfur og tekur hana upp. Frænka hans, Helga Jónsdóttir, spilar með honum á selló og hljóðgervil. Síðastliðið eitt og hálft ár hafa þau verið að þróa með sér leikrænan en naumhyggjulegan sækadelískan poppbræðing sem gat af sér plötuna Cupid Makes a Fool of Me sem þau gáfu sjálf út á síðasta ári. Platan hefur fengið frábæra dóma, fékk tónlistarverðlaun Kraums og komst á lista Fréttablaðsins, Fréttatímans, Dr Gunna, Rjómans, Straums og KEXP yfir bestu plötur ársins. Á tónleikunum í Mengi leika þau lög af plötunni í fyrsta skipti opinberlega eftir að hún kom út. Tónleikarnir hefjast 21:00 og aðgangseyrir er 2.000 kr.

 

Raftónlistarhópurinn Weirdcore heldur upphitunartónleika fyrir Sónar hátíðina á Harlem. Fram koma Sometime, Futuregrapher og Tanya & Marlon. DJ Yamaho mun svo þeyta skífum að tónleikunum loknum. Leikar hefjast klukkan 21:00 og það er fríkeypis inn.

Laugardagur 8. febrúar

Ultra Mega Technobandið Stefán heldur útgáfutónleika á Harlem en önnur plata sveitarinnar kom út í nóvember. Highlands munu hita upp og plötusnúðatvíeykið Nuke Dukem munu halda stuðinu gangandi eftir tónleikana. Gleðin hefst á slaginu 22:00 og aðgangseyrir er 1000 krónur.

 

Poppprinsessan Leoncie treður upp á Gauk á Stöng og aðstandendur taka tónleikanna taka fram að hún muni árita hljómplötur sínar á staðnum. Hide Your Kids hita upp en tónleikarnir hefjast klukkan 22:00 og aðgangseyrir er 1000 krónur.

Neil Young & The Crazy Horse til Íslands

Hinn kanadíska rokkhetja Neil Young er væntanleg til Íslands í sumar og mun halda tónleika í Laugardalshöllinni þann 7. júlí. Tónleikarnir eru haldnir í tengslum við All Tomorrow’s Parties tónlistarhátíðina. Hljómsveitin Crazy Horse sem hefur leikið með honum um áratugaskeið verður með í för en þetta verða fyrstu tónleikarnir á tónleikaferðalagi Young um Evrópu. All Tomorrow’s Parties verður haldin í Ásbrú 10. til 12. júlí en þar koma meðal annars fram Portishead, Interpol og Kurt Vile.

Pixies til Íslands í sumar

Bandaríska rokksveitin Pixies er væntanleg til Íslands í sumar og mun halda tónleika í Laugardalshöllinni þann 11. júní. Sveitin sem var upp á sitt besta í lok 9. áratugarins og upphafi þess 10. með plötum eins og Surfer Rosa og Dolittle, hefur áður komið til Íslands en hún lék á tveimur tónleikum fyrir troðfullum Kaplakrika árið 2004. Nýlega hafa Pixies gefið frá sér tvær stuttskífur og von er á breiðskífu frá þeim á árinu.

Flaming Lips á Iceland Airwaves

Tilkynnt var um fyrstu listamennina sem hafa verið bókaðir á næstu Iceland Airwaves hátíð í dag og þar ber hæst bandarísku indísveitina Flaming Lips, en hún mun loka hátíðinni á sunnudagskvöldinu. Af öðrum erlendum sveitum má nefna frönsku rafpönksveitina La Femme og Suður-Afríska tónlistarmanninn John Wizards. Aðrir erlendir listamenn eru East India Youth, Jungle og Blaenavon frá Bretlandi, hinn finnski Jaakko Eino Kalevi og Tiny Ruins frá Nýja Sjálandi.

 

Þá hafa íslensku sveitirnar Just Another Snake Cult, Highlands, Samaris, Mammút, Grísalappalísa, Vök, Muck, Snorri Helgason og Tonik verið bókaðar á hátíðina. Þrátt fyrir að fókus Iceland Airwaves sé á nýjar og upprennandi hljómsveitir hefur sú hefð komist á undanfarin ár að fá þekkta tónlistarmenn til að loka hátíðinni. Flaming Lips sem eru sannkallaðir risar í indíheiminum munu sjá um það hlutverk að þessu sinni ásamt annarri sveit, sem tilkynnt verður um síðar, að fram kemur í tilkynningu frá Iceland Airwaves. Flaming Lips hafa áður spilað á Iceland Airwaves árið 2000, en hátíðin fer fram í 15. sinn þann 5. til 9. nóvember næstkomandi.


Metronomy sendir ástarbréf

Metronomy sendi í dag frá sér lagið Love Letters. Í því rær hann á mið 7. og 8. áratugarins í lagi sem er í senn bítla- og bowie-legt. Það eru skoppandi píanóhljómar sem drífa það áfram og viðlagið er eins og eitthvað úr hippasöngleiknum Hárinu. Metronomy fékkst aðallega við raftónlist í byrjun ferilsins en á sinni síðustu plötu, The Englis Riviera frá 2010, sneri hann sér hins vegar að skúturokki. Love Letters er önnur smáskífan og titillagið af væntanlegri breiðskífu Metronomy sem kemur út 10. mars næstkomandi. Í haust kom út lagið I’m Aquarius og af hljómi laganna, titlum og myndinni á hulstrinu að dæma, virðist platan vera undir sterkum áhrifum frá sumari ástarinnar og hippatímabilinu.

Tónleikahelgin 23.-25. janúar

Fimmtudagur 23. janúar
Tónlistarmaðurinn Skúli Mennski verður með tónleika á hostelinu Hlemmur Square á laugarvegi 105. Aðgangur er ókeypis og spilamennska hefst klukkan 20:00.

 

Raftónlistarforlagið Möller Records stendur fyrir sínum mánaðarlega Heiladans á Bravó, laugavegi 22. Að þessu sinni mun Möller Records fagna nýjustu afurð forlagsins en það er breiðskífan Journey með raftónlistarmanninum Bistro Boy. Einnig koma fram Dj Myth & Lazybones, Árni² og Tranquil. Dagskráin hefst kl. 21:00 og er aðgangur ókeypis.

 
Tónlistarmennirnir Indriði Arnar Ingólfsson og Tumi Árnason frumflytja nýtt efni í Mengi. Á þessum tónleikum munu þeir þræða og halda uppá tónlistarsamstarf og vinskap sinn, spila gömul lög og semja ný. Indriði Arnar Ingólfsson hefur meðal annars starfað sem gítarleikari hljómsveitarinnar Muck og með tónlistarmanninum Úlfi Hanssyni. Tumi Árnason er saxófónleikari sem hefur meðal annars starfað með hljómsveitunum Grísalappalísu, Ojba Rasta og The Heavy Experience, og hefur unnið með tónlistarmönnunum Úlfi Hanssyni og Tonik. Aðgangseyrir er 2000 krónur og leikar hefjast klukkan 21:00.

 
Fjöllistahópurinn Tónleikur stendur fyrir hljómleikum á Loft Hostel. Að þessu sinni stíga á stokk FrankRaven, Tré, Tinna Katrín og Ósk & Brynja. Tónleikarnir hefjast klukkan 20:30 og aðgangur er ókeypis.

 
Það verða heljarinnar Metal tónleikar á Dillon. Fram koma Darknote, Trust the Lies og Conflictions. Málmveislan hefst 22:00 og aðgangur er ókeypis.

 
Föstudagur 24. janúar

 
Kira Kira er komin heim eftir 5 ára leiðangur og í tilefni heimkomunnar efnir hún til tónleika í Mengi við Óðinsgötu 2. Hennar þriðja breiðskífa, Feathermagnetik, kom nýverið út hjá Morr Music. Raftónlist samofin lifandi hljóðfæraleik með áherslu á brass, kontrabassahljóðfæri, heimatilbúið slagverk, óstýriláta analog hljóðgerfla og söng hvílir í hjarta plötunnar og þess sem Kira Kira fæst við þessa stundina. Tónleikarnir hefjast klukkan 21:00 og aðgangseyrir er 2000 krónur.

 
Ómkvörnin, tónlistarhátíð tónsmíðanema, verður sett í Hörpu. Þar verða frumflutt tónverk tónsmíðanema við tónlistardeild Listaháskóla Íslands þar sem glæný og töfrandi tónlist verður til vitnis um hina fjölbreyttu flóru ungra íslenskra tónskálda. Tónleikarnir verða í Kaldalónssal Hörpu og hefjast klukkan 20:00 en aðgangur er ókeypis.

 
Laugardagur 25. janúar
Tinna Þorsteinsdóttir kemur fram á tónleikum í Mengi. Tinna er liðtæk í tilraunatónlistarsenunni á Íslandi og hefur frumflutt um 50 verk í ýmsum birtingarformum. Á þessum tónleikum munu heyrast fjölbreytt verk fyrir dótapíanó, m.a. eftir John Cage, Pál Ivan Pálsson, Þráin Hjálmarsson og P.D.Q. Bach. Aðgangseyrir er 2000 krónur og tónleikarnir hefjast 21:00.

Lag og myndband frá Damon Albarn

Damon Albarn frumsýndi á netinu rétt í þessu myndband við titillag væntanlegrar sólóskífu sinnar, Everyday Robots. Platan kemur út þann 28. apríl og meðal gesta á henni verða Brian Eno og Natasha Khan úr Bat for Lashes. Lagið er lágstemmt og angurvært með hikandi raftakti, blúsuðu píanói og ómstríðum fiðluhljóðbút. Myndbandið er allsérstætt en í því er sneiðmyndaskönnun og tölvuteikningum beitt til að endurskapa höfuðlag Damons sjálfs á gallsúran hátt. Horfið á myndbandið hér fyrir neðan.

Nýtt lag með Beck

Hinn fjölhæfi tónlistarmaður Beck Hansen gaf út lagið Blue Moon í dag, en það er hið fyrsta til að heyrast af væntanlegri breiðskífu, Morning Phase, sem kemur út síðar á árinu. Lagið er ljúfsár ballaða sem minnir nokkuð á plötu Beck frá 2002, Sea Change. Heil sex ár eru liðin frá síðustu hljóðversplötu Beck, Modern Guilt, sem hann vann í samstarfi við upptökustjórann Dangermouse árið 2008. Hlustið á lagið hér fyrir neðan.

Kurt Vile og Swans á ATP

Sex erlendum hljómsveitum hefur nú verið bætt við dagskrá All Tomorrow’s Parties hátíðarinnar sem fer fram á Ásbrú 10.-12. júlí næstkomandi: Kurt Vile & The Violators, Swans, Fuck Buttons, The Haxan Cloak, Forest Swords og Eaux. Kurt Vile var áður í hljómsveitinn War on Drugs en síðasta sólóskífa hans, Walking on a Pretty Daze, hefur hlotið afbragðsdóma gagnrýnanda og var fimmta besta plata ársins að mati straum.is. Hin sögufræga stórsveit Swans átti að koma til Íslands á þarsíðustu Airwaves hátíð en þurfti frá að hverfa vegna fellibylsins Sandy, og þess vegna ánægjulegt að hana reki loksins á strandir landsins.

Kurt Vile & The Violators og Swans verða á meðal þeirra sem koma fram fimmtudaginn 10. júlí. Fuck Buttons og The Haxan Cloak koma fram föstudaginn 11. júlí ásamt Portishead sem tilkynnt var að kæmi fram á hátíðinni í síðustu viku. Forest Swords og Eaux munu spila á lokadegi hátíðarinnar laugardaginn 12. júlí ásamt Interpol sem einnig var tilkynnt í síðustu viku.

Áður var einnig búið að tilkynna hljómsveitirnar Mammút, For a Minor Reflection, Samaris, Sóley og Low Roar á hátíðina. Fleiri hljómsveitir sem fram koma á hátíðinni verða kynntar á næstu vikum en hægt er að lesa umfjöllun straum.is um síðustu All Tomorrow’s Parties hátíð hér. Hlustið á tóndæmi með sveitunum hér fyrir neðan.



Tónleikahelgin 8.-11. janúar

Miðvikudagur 8. janúar

Hljómsveitirnar Oyama, Halleluwah og Hljómsveitt munu troða upp á nýja skemmtistaðnum Paloma sem er fyrir ofan Dubliners í Naustinni 1-3. Oyama hyggjast spila nýtt efni á tónleikunum en sveitin vinnur nú að sinni fyrstu breiðskífu. Halleluwah er verkefni Sölva Blöndal sem áður var í Quarashi en honum til halds og trausts er söngkonan Rakel Mjöll. Tónleikarnir hefjast klukkan 21:00 og það er frítt inn.

 

Á Gamla Gauknum stíga sveitirnar Skerðing og While My City Burns á stokk. Aðgangur er ókeypis og leikar hefjast klukkan 21:00.

Fimmtudagur 9. janúar

Michael Anderson, betur þekktur undir listamansnafninu DREKKA, kemur fram á tónleikum á Dillon. DREKKA spilar draumkennda industrial tónlist sem mætti líkja við hljómsveitir á borð við Coil og The Shadow Ring. Á næstunni kemur út plata frá honum á DAIS útgáfunni (Iceage, Psychic TV, Cold Cave) sem tekin var upp á Íslandi. Honum til halds og trausts verða tónlistarmaðurinn Þórir Georg, Kælan Mikla og Börn. Tónleikarnir hefjast 22:00 og aðgangur er ókeypis.

 

Það verður þungarokksveisla á Gamla Gauknum þar sem Blood Feud, Darknote og Wistaria munu þeyta flösu. Tónleikarnir hefjast upp úr 21:00 og ókeypis er inn.

Föstudagur 10. janúar

Reggístórsveitin Ojba Rast kemur fram á Gamla Gauknum en önnur breiðskífa sveitarinnar, Friður, kom út í vetur og hefur fengið feikna góðar viðtökur. Dyrnar opna 21:00, tónleikarnir byrja 22:00 og aðgangseyrir er 1500 krónur.

 

Stuð- og gleðisveitin Babies kemur fram á hip hop staðnum Prikinu. Aðgangseyrir er ekki til staðar og fjörið hefst klukkan 22:00.

 

Tónskáldahópurinn S.L.Á.T.U.R. fagnar nýju ári með tónleikum í Mengi við Óðinsgötu 2. Þar verður flutt glæný tónlist fyrir klarinettur sem hafa verið undirbúnar sérstaklega, breyttar og endurhannaðar til að kalla fram nýjan hljóðblæ, nýjar stillingar og framlengja möguleika hljóðfærisins. Fjórir klarínettuleikarar munu flytja tónlistina en tónleikarnir hefjast klukkan 21:00 og aðgangseyrir er 2000 krónur.

 

Það verður metalveisla á Dillon og hljómsveitirnar Darknote og Jötunmóð koma fram. Aðgangseyrir er enginn og málmurinn byrjar að óma á slaginu 22:00.

Laugardagur 11. janúar

Skóglápsrokkararnir í Oyama verða aftur á ferðinni á laugardagskvöldinu, að þessu sinni í Gym & Tonik salnum á Kex Hostel. Tónleikarnir hefjast klukkan 21:00 og það er ókeypis inn.

 

Það verður bluegrass hátíð á Gamla Gauknum en þar kemur fram hljómsveitin Illgresi ásamt Hjalta Þorkelssyni (var í sveitinni Múgsefjun) og öðrum góðum gestum. Hljómleikarnir hefjast klukkan 22:00.

 

Hljómsveitirnar Fivebellies og Dýrðin stíga á stokk á Dillon. Lætin hefjast 22:00 og aðgangseyrir er ókeypis.