Author: davidrg

1 árs afmæli straum.is

Mynd: Alexander Matukhno

Síðasta sumar höfðu undirritaðir fengið sig fullsadda af skorti á tónlistarumfjöllun á hinum íslenska hluta alnetsins og tóku höndum saman um stofnun nýrrar síðu, þeirrar sem þú ert að lesa núna. Undanfarið ár höfum við haldið úti reglulegri umfjöllun um nýja og ferska tónlist, íslenska sem erlenda, og höfum í því skyni birt yfir 400 fréttir á vefnum. Á liðnu ári höfum við einnig bætt við okkur pennum og hafið samstarf við tímaritið Grapevine þar sem við erum með dálk og förum yfir helstu fréttir úr íslenskri tónlist. Þann 21. júlí síðast liðinn var eins árs afmæli síðunnar og það kom svo flatt upp á okkur að við höfðum ekki tíma til að skipuleggja hátíðarhöld, fyrr en nú. Í dag á  vefritið eins árs, eins mánaðar og eins dags afmæli og í tilefni af því sláum við upp veislu á skemmtistaðnum Harlem. Kammerpoppsveitin Útidúr og Lo-fi tilraunabandið Just Another Snake Cult munu stíga á stokk og leika listir sínar en báðar komu við sögu á árslista vefritsins fyrir síðasta ár. Ritstjórnarfulltrúar straum.is munu þeyta skífum fyrir dansi í hliðarsal og eftir tónleikana og eitthvað af ókeypis bjór verður í boði fyrir stundvísa gesti, en hátíðarhöldin hefjast klukkan 21:00. Við bjóðum alla lesendur og ömmur þeirra hjartanlega velkomna til að fagna með okkur og lofum að láta ekki deigan síga heldur bæta bara í á næsta starfsári síðunnar.

Óli Dóri og Davíð Roach

Tónleikar helgarinnar

Eins og flestar vikur er fjölbreytt úrval tónleika á höfuðborgarsvæðinu þessa helgi og hér verður farið yfir það helsta.

Miðvikudagur 7. ágúst

Tónlistarhópurinn Tónleikur mun halda sína stærstu tónleika hingað til á Rósenberg í kvöld. Tónleikur er hópur sem samanstendur af listamönnum sem öll eiga það sameiginlegt að semja sína eigin tónlist og í kvöld munu koma fram yfir tugur flytjenda; Martin Poduška, Raffaella, Ragnar Árni, slowsteps, val kyrja/Þorgerður Jóhanna, Tinna Katrín, Þorvaldur Helgason, Jakobsson, FrankRaven, Johnny and the Rest, Hljómsveitt og Forma. Fjörið hefst klukkan 20:30 og ókeypis er inn, en hattur verður á staðnum til að taka við frjálsum framlögum.

Hljómsveitin Eva verður öfug, hinsegin og alls konar á Kíkí í kvöld þar sem hún hitar upp fyrir Gay Pride gönguna sem verður um helgina. Leynigestur kvöldsins verður engin önnur en hin íðilfagra Ólafía Hrönn og mun hún flytja áheyrendum nokkur af sínum einstöku lögum. Öfurheitin hefjast klukkan 21:00 og aðgangseyrir er 1000 krónur.

Daníel Friðrik Böðvarsson gítarleikari og Ingimar Andersen saxófónleikari leika djass frá 10 til 1 á Boston. Báðir eru þeir búsettir erlendis og taka hér höndum saman eftir langan aðskilnað og ókeypis er inn á viðburðinn.

Fimmtudagur 8. ágúst

Hljómsveitin Orfía, samstarfsverkefni Arnar Eldjárns og Soffíu Bjargar, spilar á ókeypis pikknikk tónleikum kl. 17:00 í gróðurhúsi Norræna hússins. Örn og Soffía stofnuðu hljómsveitina Orfía árið 2011 eftir að hafa starfað saman í hljómsveitinni Brother grass um árabil.

Hljóðverk eftir Berglindi Jónu Hlynsdóttir & Guðmund Stein Gunnarsson verður flutt af Hljómskálanum í Hljómskálagarðinum klukkan 18:00. Verkið er hljóðinnsetning og myndverk í almenningsrými sem nýtir Hljómskálann sjálfan, sögu hans, staðsetningu í borginni og umhverfi til þess að lífga við þessa táknmynd sem er í senn minnisvarði, hús og svæði sem hefur sérstakt menningarlegt og sögulegt gildi í borginni.

Opnunarhátíð Hinsegindaga verður haldin í Silfurbergi í Hörpu og hefst klukkan 21:00. Á stokk stíga ýmsir þjóðþekktir tónlistarmenn sem á einn eða annan hátt tengjast sögu hinsegin fólks, baráttu þess og listsköpun. Aðgangseyrir er 2500 krónur.

Föstudagur 9. ágúst

Retro Stefson og Hermigervill munu kveðja hinn ástsæla tónleikastað Faktorý. Segja má að hljómsveitin hafi stigið sín fyrstu spor á staðnum þegar hún kom fram á Airwaves hátíðinni 2006 þó að staðurinn hafi þá borið heitið Grand Rokk. Tónleikarnir hefjast klukkan 23:00 og aðgangseyrir er 2000 krónur.

Brimbrettarokksveitin Bárujárn efnir til tónleika til að fagna nýútkomnum geisladiski sínum. Tónleikarnir munu fara fram í kjallara skemmtistaðarins Bar 11 að Hverfisgötu 18 og hefjast leikar klukkan 22:00. Á tónleikunum verða öll lögin af disknum leikin, en auk þess hefur sveitin rifjað upp nokkur af sínum gömlu lögum og má því búast við löngu og sveittu prógrammi. Um upphitun sér hin stórefnilega brimrettarokksveit Godchilla og ljóðskáldið Jón Örn Loðmfjörð. Aðgangur er ókeypis en bjór og geisladiskar verða til sölu á tilboðsverði.

Strengja-og vélasveitin Skark gerir atlögu að tónleikaforminu í bílastæðahúsi Hörpu. Verk eftir Pál Ragnar Pálsson, Viktor Orra Árnason, György Ligeti, Alfred Schnittke og John Wilbye verða flutt en atlagan hefst klukkan 20:00 og aðgangseyrir er 2500 krónur.

Laugardagur 10. ágúst

Helgi Rafn, söngvari og lagahöfundur, flytur 10 ný “kammer pop” lög á íslensku og ensku fyrir raddir og strengi ásamt Bartholdy strengjakvartettnum frá London. Tónleikarnir verða í húsnæði Leikfélags Kópavogs, en það rými var valið svo hægt væri að skapa leikræna og nána stemmingu. Aðgangseyrir er 1200 krónur og hljómleikarnir hefjast klukkan 21:00.

Sunnudagur 11. ágúst

Frá upphafi hefur Faktorý átt sér heitan draum um stefnumót við stórhljómsveitina Gus Gus. Nú mun sá draumur loks verða að veruleika því hljómsveitin hefur þáð heimboð á Faktorý. Til slíks viðburðar er ekkert kvöld meira viðeigandi en síðasta kvöld staðarins, sunnudagurinn 11. ágúst. Gestir ættu allir að finna eitthvað við sitt hæfi því hljómsveitin ætlar að spila gamla slagara í bland við nýtt óútgefið efni af væntanlegri plötu sveitarinnar. Uppselt er á viðburðinn en þeim lesendum sem eru virkilega heitir er bent á barnaland.

 

 

 

Tónleikar helgarinnar

Þessa síðustu helgi júlímánaðar er margt á döfinni í hljómleikahaldi á höfuðborgarsvæðinu og verður hér farið yfir helstu atriði sem endranær.

Miðvikudagur 24. júlí

Hljómsveitirnar Amiina og Sin Fang halda tónleika í Fríkirkjunni í Reykjavík klukkan 20:30. Báðar hljómsveitir hafa sent frá sér nýtt efni á árinu og hafa verið iðnar við tónleikahald erlendis, en ekki komið mikið fram á Íslandi. Aðgangseyrir er 2500.

Tónleikar til heiðurs alþjóðlega tungumálsins Esperantó verða haldnir á Gamla gauknum. Fram koma Sindri Eldon & The Ways og harmonikkuleikarinn Kimo sem spilar ska tónlist og syngur á esperantó. Tónleikarnir hefjast klukkan 21:00 og það er ókeypis inn.

Bam Margera úr Jackass og Viva La Bam ásamt hljómsveitinni CKY kynna F***KFACE UNSTOPPABLE en þeir munu halda tónleika og ýmis uppátæki á Spot í Kópavogi. Vitleysingurinn Brandon Novak úr Jackass og Viva La Bam kemur einnig fram og hin frábæra íslenska hljómsveit Morðingjarnir munu taka sín bestu lög og sjá um að trylla lýðinn. Gleðskapurinn hefst klukkan 20:00 og aðgangseyrir er 4900 krónur.

Kvennarappkvöld verður haldið á 11-unni og hefst það klukkan 21:00.  Þar verður rappað, stappað, ljóðaslammað, sungið, spilað, bítboxað, spunnið, klappað og allur andskotinn að sögn skipuleggjanda. Fram kemur heill kvennaskari: Alvia Miakoda Islandia, Þuríður Blær Jóhannsdóttir, Þórdís Nadia Semichat, Solveig Pálsdóttir, Kolfinna Nikulásdóttir, Anna Tara Andrésdóttir, Katrín Helga Andrésdóttir, Agnes Björgvinsdóttir, La La Bitches!, Tinna Sverrisdóttir og fleiri nettar. Aðgangur eru ókeypis.

Fimmtudagur 25. júlí

Úr dimmum skúmaskotum Kópavogs, þar sem ungir pönkarar og vandræðaunglingar héngu áður fyrr mun nú aftur óma framandi tónlist. Hljóðgjörningafélagið HULK hefur hóað saman tónlistamönnum úr ýmsum áttum til að fylla undirgöngin undir Hamraborg (við Digranesveg) aftur af óhljóðum. Fram koma Rafmagnús, Mudd Mobb, Krakkbott og DJ Flugvél og geimskip. Ólætin hefjast klukkan 19:00 og standa fram eftir kvöldi og eru fríkeypis öllum sem mæta.

Fríða Dís Guðmundsdóttir spilar og syngur draumkennda tóna á ókeypis pikknikk tónleikum kl. 17:00 í gróðurhúsi Norræna hússins. Fríða Dís flytur efni af væntanlegri sóló plötu sinni en hún hefur starfað um árabil með hljómsveitunum Klassart og Eldum. Pikknikk tónleikarnir eru hluti af órafmagnaðri Pikknikk tónleikaröð sem haldin er á fimmtudögum í sumar. Veitingar eru seldar í afgreiðslu Norræna hússins og bornar fram í pikknikk körfum.

Íslandselskhuginn John Grant kemur fram á tveimur tónleikum á Faktorý sem eru á sínum lokametrum fyrir yfirvofandi lokun í Ágúst. Uppselt er á tónleikana sem hefjast klukkan 22:00 en vegna mikilla eftirspurnar var bætt við öðrum tónleikum klukkan 19:30 sem enn eru til miðar á en aðgangseyrir er 3000 krónur. Grant sendi frá sér sýna aðra breiðskífu „Pale Green Ghosts“ fyrr á þessu ári og hefur hún fengið góða dóma hjá flestum helstu tónlistartímaritum heims.

Slegið verður upp Næntís Veizlu á barnum Harlem en skipuleggjendur hennar vilja koma eftirfarandi á framfæri: „Nú er kominn tími til að rifja upp gullna öld, öld þar sem menn voru ennþá viðkvæmir og misskildir og konur voru ennþá of kúl fyrir skólann sem þær voru ekki í. Já, ég er að tala um tíunda áratug síðustu aldar, áratug Doc Martens, köflóttra skyrtna og hettupeysna bundna um mittið.“  Á kvöldinu koma fram Dýrðin, Treisí, Sindri  Eldon & The Ways og svo mun Sindri Eldon þeyta skífum þar til opnunartíma þrýtur. Veislan byrjar 21:00, öllum er boðið og það er ókeypis inn.

Fjölsveitahópurinn Tónleikur heldur áfram að troða upp á Loft Hostel. Að þessu sinni stíga á stokk Ragnar Árni, val kyrja, Tinna Katrín, Pocket, Brynja, Ósk, FrankRaven og Johnny and the Rest. Leikar hefjast 20:30 og allir geta notið þeirra óháð efnahags.

Heiladanskvöld númer 26 verður haldið á hinum nýopnaða Bravó við laugaveg 22 og þar verður framsækinni raftónlist komið á framfæri sem endranær. Í þetta skipti munu DJ Dorrit, Atom Max, Radio Karlsson og Árni² leiða heilafrumur viðstaddra í trylltum dansi en ókeypis er inn á viðburðinn. Dansinn byrjar að duna klukkan 21:00.

Föstudagur 26. júlí

Hljómsveitin Grísalappalísa efnir til tónleika í plötubúðinni og höfuðstöðvunum 12 Tónum á Skólavörðustíg. Grísalappalísa hefur undanfarin misseri verið að gera garðinn frægan fyrir hnífskarpan flutning sinn og ólætin í söngvaranum honum Gunnari. Plata þeirra, ALI, kom út 10. júlí síðastliðin og hefur fengið einróma lof og hylli þjóðar og gagnrýnanda. Lætin byrja klukkan 18:00.

Hljómsveitirnar Agent Fresco, Mammút og Benny Crespo’s Gang kveðja Faktorý með tónleikum eins og margar af helstu sveitum landsins hafa gert undanfarið. Efri hæð opnar 22:00, tónleikar hefjast 23:00 og aðgangseyrir er 1500 krónur.

Laugardagur 27. júlí

Hljómsveitirnar RIF og Kjarr leiða saman hesta sína og blása til allsherjar sumargleði á Rósinberg. Lagið Sól í sinni með RIF hefur verið að sörfa ljósvakann í sumar við góðann orðstýr en strákarnir eru nú að sjóða saman í sína fyrstu breiðskífu. Kjarr gaf út plötu samnefnda sveitinni fyrir tveimur árum síðan en hefur enn ekki flutt efnið fyrir okkur íslendinga, þar má finna smelli eins og Beðið eftir sumrinu og Quanum leap. Tónleikarnir hefjast klukkan 22:00.

Sunnudagur 28. júlí

Snorri Helgason heldur tónleika ásamt hljómsveit í Gljúfrasteini í Mosfellsbæ. Hann hefur spilamennsku stundvíslega klukkan 16:00 og aðgangseyrir er 1000 krónur.

 

 

 

 

 

Tónleikar helgarinnar

Straum.is er snemma í því að þessu sinni að taka saman tónleika helgarinnar vegna þess að miðvikudagskvöldið er óvenju öflugt í tónleikahaldi í þessari viku. Lesið, njótið og mætið.

Miðvikudagur 10 júlí

Síðustu daga Faktorý nálgast nú óðum og undanfarið hafa ýmsir þekktir tónlistarmenn kvatt þennan ástkæra tónleikastað með því sem þeir kunna best, að halda hljómleika. Í kvöld munu Sin Fang og Pascal Pinion segja bless við Faktorý en tónleikarnir hefjast klukkan 21:00 og aðgangseyrir er 1500 krónur.

Hin aldna söngdíva Dionne Warwick syngur á stórtónleikum í Eldborgarsal Hörpu. Hana er óþarfi að kynna en ennþá eru til miðar á midi.is

Breski plötusnúðurinn Mixmaster Morris sem kominn er hingað til lands til að leika á Extrem Chill hátíðinni á Hellissandi mun þeyta skífum í plötubúðinni Lucky Records frá 16 til 19 í dag.

Grísalappalísa heldur útgáfugleðskap á Kex Hostel sem hefst klukkan 20:00. Glænýtt tónlistarmyndband verður frumsýnt og veigar verða í boði, auk þess sem reggísveitin Amaba Dama stígur á stokk. Aðgangur er ókeypis.

Fimmtudagur 11. júlí

Samaris halda útgáfutónleika á Volta af því tilefni að EP-plöturnar Hljómar Þú og Stofnar falla hafa nú verið gefnar út saman í einum pakka, en þær voru uppseldar og þess vegna ófáanlegar. Tónleikarnir hefjast klukkan 21:00 og aðgangseyrir er 1000 krónur, eða 2500 og þá fylgir geisladiskurinn með. Einnig koma fram Yagya og Dj Yamaho.

Skúli Mennski er nýkominn í bæinn eftir vel heppnaða tónleikaferð um landsbyggðina og til að fagna því slær hann upp uppskeruhátíð á Rósenberg. Þar munu Skúli mennski og Robert the Roommate tefla fram sínu allra besta eftir túrinn. Herlegheitin hefjast 21:00 og aðgangseyrir er 1500.

Fjöllistahópurinn Tónleikur kemur fram á Loft Hostel. Leikurinn og leikarnir hefjast klukkan 20:30 og aðgangseyrir er enginn eins og venjulega.

Þetta kvöldið verða það rapparar sem sjá um að kveðja Faktorý þegar Forgotten Lores, Heimir BjéJoð (úr Skyttunum), B-Ruff og nýstirnið Kött Grá Pé leiða saman hesta sína og rímur. Dyrnar opnast 21:00, rappleikarnir hefjast klukkutíma síðar og það kostar 1500 inn, en stór bjór fylgir fyrir þá 150 fyrstu sem kaupa sig inn.

Klukkan 20:00 mun áhöfnin á Húna sigla til Reykjavíkur og halda risatónleika í Gömlu höfninni í Reykjavík. Sem fyrr ætlar áhöfnin að styrkja björgunarsveitirnar í landinu með því að gefa alla vinnu sína og rennur aðgangseyrir beint til björgunarsveitanna í Reykjavík. Téður eyrir er 1500 krónur en ókeypis er einn fyrir börn 12 ára og yngri.

Hljómsveitin Ylja spilar hugljúfa folk tónlist í gróðurhúsi Norræna hússins á ókeypis Pikknikk tónleikum klukkan 17:00.

Föstudagur 12. júlí

Hljómsveitin Bárujárn og tónlistarmaðurinn Jón Þór leiða saman bikkjur sínar og glamra á gaddavíra á Hressó í kvöld. Brimbrettarokksveitin Bárujárn gaf nýverið út sína fyrstu breiðskífu og fyrsta plata Jón Þórs, Sérðu mig í Lit, fékk góðar viðtökur þegar hún kom út seint á síðasta ári. Tónleikarnir hefjast klukkan 22:30 og það er ókeypis inn en hægt verður að kaupa plötur af listamönnunum á staðnum.

Tónleikarnir Upp rís úr rafinu, sem helgaðir eru akústískri raftónlist, verða haldnir í Kaldalóni Hörpu klukkan 20:00. Þar munu tónskáldin Árni Guðjónsson, Bergrún Snæbjörnsdóttir, Finnur Karlsson, Gunnar Gunnsteinsson, Halldór Smárason og Haukur Þór Harðarson temja skepnur rafsins hver á sinn hátt svo þær leiki um skyn áheyrandans ýmist í samhljómi með akústískum hljóðfærum eða syngjandi einar síns liðs. Aðgangseyrir er 1500 krónur.

Að lokum er vert að minnast á tvær frábærar en mjög ólíkar tónlistarhátíðir sem hefjast báðar á föstudeginum, Raftónlistarveisluna Extreme Chill á Hellissandi á Snæfellsnesi og svo þungarokkshátíðin Eistnaflug sem haldin er á Neskaupstað. Hátíðirnar standa fram á sunnudag.

Laugardagur 13. júlí

Listamenn af Rauðasandi Festival 2013 ætla að þakka fyrir sig með tónleikum á Gamla Gauknum en fram koma Nolo, Babies, Amaba Dama og Hljómsveitt. Ballið hefst klukkan 22:00 og það er ókeypis inn.

Síðasta fastakvöld RVK Soundsystem verður haldið á Faktory í hliðarsalnum og hefst það að venju á slaginu miðnætti.

Útgáfupartý Grísalappalísu

Fyrsta plata reykvísku sveitarinnar Grísalappalísu kemur út í dag og ber hún heitið Ali. Platan er ferskur andblær í íslenska tónlistarsenu, hrærigrautur af fönkuðu pönki, nýbylgju og súrkáli með íslenskum textum sem eiga meira skylt við ljóð en hefðbundna rokktexta. Í tilefni af útgáfunni verður haldið teiti á KEX Hostel klukkan 20:00 í kvöld en þá verður frumsýnt myndband við lagið Hver er ég? Léttar veigar verða í boði og hljómsveitirnar Amaba Dama og Létt á bárunni leika fyrir dansi og gleði.

Listahátíð á Stöðvarfirði

Pólar festival er tveggja daga lista- og frumkvöðlahátíð sem verður haldin á Stöðvarfirði næstu helgi. Hátíðin er haldin í samvinnu við Maður er manns gaman, sjálfbæra þorpshátíð sem hefur verið starfrækt á Stöðvarfirði undanfarin ár.

Pólar byggir á hugmyndafræði sem mætti þýða á íslensku sem hæfileikasamfélag (e. skillsharing).  Ætlunin er að  ná saman fólki úr ólíkum áttum og margvíslegum skapandi greinum til þess að deila reynslu sinni og þekkingu og rannsaka nýja möguleika í samvinnu, sköpun og framleiðslu. Dagskráin felst í stuttum og fjölbreyttum námskeiðum, fyrirlestrum og ýmsum listviðburðum.

Á laugardeginum verður svo slegið upp heljarinnar tónleikum þar sem diskóboltarnir í Boogie Trouble og lo-fi grallararnir í Just Another Snake Cult stíga á stokk ásamt trip hop sveitinni Urban Lumber.

Seinna kvöldið á ATP

Þegar ég mætti Atlantic Studios seinna kvöldið var eitursvali silfurrefurinn Jim Jarmuch á sviðinu með hljómsveit sinni Squrl. Lýsingin var myrk og ekki mikið um hreyfingu á sviðinu og tónlistin var hægfljótandi surgrokk í ætt við hljómsveitir eins og Galaxy 500. Þetta var ágætlega gert hjá þeim en samt var eins og vantaði einhvern frumleikaneista. Það verður líka að segjast eins og er að Jarmusch-inn er ekkert sérstakur söngvari. Sönglausu lögin voru best og stundum tókust þau á loft í töffaralegum fídbakk og fuzz köflum. Jarmuch er allavega talsvert betri á baki við kvikmyndatökuvélina en hljóðnemann.

Guð mætir á svið

Eftir að Squrl höfðu lokið sér af tók við rúmlega klukkutíma bið eftir manninum sem flestir voru komnir að sjá. Geði var blandað, hamborgurum sporðrennt og sígarettur reyktar á meðan að það tók að fjölga talsvert á hátíðarsvæðinu þegar líða dró nær tónleikunum. Það var greinilegt að Hellirinn trekkti að því talsvert meira af fólki var inni í Atlantic Studios rétt fyrir tónleikana en á kvöldinu áður. Þegar hljómsveitin var að koma sér fyrir var stigmagnandi eftirvænting í loftinu sem sprakk síðan út þegar Cave stormaði inn á sviðið, það var gærdeginum ljósara að einhvers konar guð var kominn í húsið. Cave spígsporaði um sviðið klæddur eins og ítalskur flagari í támjóum skóm, fjólublárri silkiskyrtu með svartlitað hárið sleikt beint aftur.

Hann byrjaði á tveimur lögum af sinni nýjustu plötu, Push The Sky Away. Flutningur sveitarinnar í Jubilee Street var óaðfinnanlegur, meðan Cave stjórnaði salnum eins og babtískur predikari. Alveg þangað til hann datt af sviðinu í lokakafla lagsins eins og þú hefur sjálfsagt lesið á hundrað vefmiðlum og horft á youtube myndbandið af tvisvar. Það sem mér fannst merkilegast var að hljómsveitin hélt áfram að rokka eins ekkert hefði í skorist og Cave stökk síðan aftur inn á sviðið mínútu síðar og byrjaði að hamra píanóið.

Kraftur á við Kárahnjúkavirkjun

Sérstaklega var gaman að fylgjast með Warren Ellis sem er með hártísku eins og rétttrúnaðargyðingur og fatastíl á við smekklegan heimilisleysingja. Hann þjösnaðist á fiðlu, gítar og þverflautu og reglulega henti hann fiðluboganum sínum upp í loftið eftir æsileg sóló. Það virtist vera starfsmaður hjá hljómsveitinni hvers helsta hlutverk var að hlaupa og ná í bogann aftur.

Sveitin spilaði í næstum tvo tíma, nýtt og gamalt efni í bland, og prógrammið innihélt marga af hans helstu slögurum eins og Weeping Song, Mercy Seat og Stagger Lee. Þetta eru listamenn og skemmtikraftar á heimsmælikvarða og krafturinn í Cave og slæmu fræjunum hans á þessum tónleikum hefði geta knúið heila Kárahnjúkavirkjun. Eftir að þeir löbbuðu út af sviðinu ærðustu áhorfendur í feikilegum fagnaðarlátum og ég hef sjaldan séð crowd  jafn ákveðið í uppklapp. Hljómsveitin lét vinna vel fyrir sér en komu loks aftur og tóku Red Right Hand. Eftir tónleikana var einróma samkomulag meðal allra sem ég talaði við að þetta hefðu verið stórfenglegir tónleikar og jafnvel þeir sem höfðu séð Cave oft áður voru sammála um að hann hefði aldrei verið betri.

Jane Fonda á bassa

Hjaltalín voru ekki öfundsverð að fylgja þessu eftir en gáfu sig öll í það og máttu vel við sitt una. Þau léku aðallega efni af sinni nýjustu og að mínu mati bestu plötu, Enter 4. Lágstemmd elektróníkin og nýklassískir strengir höfðu dáleiðandi áhrif og Högni og Sigríður Thorlacious harmóneruðu sem aldrei fyrr. Deer Hoof voru næst á dagskrá og skiluðu frábærlega sýrðu gítarrokki af mikilli innlifun. Söngkona og bassaleikari sveitarinnar fór á kostum og tók meðal annars dansspor sem minntu á Jane Fonda leikfimiæfingar. Eitt af skemmtilegum smáatriðum sem gera hátíðina sérstaka var að inni í Atlantic Studios var boðið upp á nudd sem ég skellti mér á og að horfa á heimsklassa rokktónleika meðan verið er að nudda mann er reynsla sem gleymist seint.

Súrkálsrokkuð trúarathöfn

Sonic Youth guðinn Thurston Moore tók sviðið næstur með sveit sinni Chelsea Light Moving og lék á alls oddi. Það var boðið upp á hávaða, gítarhjakk, og surg og allt saman hrátt, hratt og pönkað. Moore tileinkaði lög Pussy Riot, Roky Eriksson úr 13th floor elevators og skáldinu William Borroughs og virðist ekkert vera að tapa orkunni með aldrinum. Síðasta sveit kvöldsins var síðan ofurtöffararnir í Dead Skeletons. Við upphaf tónleikanna var listamaðurinn og leiðtoginn Jón Sæmundur að mála mynd af hauskápu á tréplötu og færðist allur í aukanna eftir því sem tónlistin þyngdist. Tónlist þeirra er drungaleg og svöl með vænum skammti af súrkálsrokki og drone-i. Þau dreifðu reykelsi út í sal og komu nánast fram eins og költ og tónleikarnir báru keim af trúarathöfn. Mjög hugvíkkandi reynsla og góður endir á frábæru kvöldi.

All Tomorrow’s Parties fór í alla staði mjög vel fram og skipuleggjendur eiga lof skilið fyrir framtakið. Umhverfið í kringum tónleikasvæðið var mjög skemmtilegt og stemmningin einstök. Það voru svona smáatriði eins og að boðið væri upp á nudd inni í Atlantic Studios, búlluborgara á svæðinu fyrir utan og óvæntir og pönkaðir tónleikar heimamannanna í Ælu á laugardeginum sem gerðu herslumuninn. Hljóð og lýsing á tónleikunum var til fyrirmyndar og tímasetningar á hljómsveitum í dagskrá stóðust alltaf. Það hefði þó verið skemmtilegt að sjá aðeins betri mætingu, sérstaklega á föstudeginum en það kom ekki að sök og vonandi verður hátíðin að árlegum viðburði í framtíðinni.

Davíð Roach Gunnarsson

Einstakt partý í Ásbrú – Fyrsta kvöld ATP

Fyrsta All Tomorrow’s Parties tónlistarhátíðin hér á landi er merkilegur viðburður í íslensku tónlistarlífi en hátíðin er þekkt fyrir einstakt andrúmsloft og metnaðarfulla dagskrá með áherslu á óháða tónlistarmenn. Stemmningin var vinaleg þegar ég mætti á svæðið eylítið seint og inni í Atlantic Studios skemmunni var Mugison að rokka úr sér lungun í lokalaginu. Veðrið skartaði blíðu og á planinu fyrir utan var hægt að kaupa sér mat og góð tónlist ómaði úr hátalarakerfinu.

Velkomin aftur

Múm voru næst að koma sér fyrir á sviðinu en tónleikar með þeim hér á landi eru fágæti sem enginn ætti að láta fram hjá sér fara. Það kom mér skemmtilega á óvart að Gyða Valtýsdóttir, sem hætti í sveitinni fyrir meira en 10 árum síðan, var með þeim á sviðinu og söng við hlið Mr. Sillu ásamt því að spila á selló. Þá muldraði og kyrjaði Örvar í gegnum skrýtinn míkrafón og raddirnar þrjár hlupu hringi í kringum hvor aðra. Þau tóku meðal annars nýtt lag sem var drungalegt rafpopp í anda Bat For Lashes þar sem Gyða fór náttúruhamförum á sellóinu.

Á ‘etta og má’etta


Næstur á svið var aldraði nýbylgjufauskurinn Mark E. Smith, leiðtogi og einræðisherra hljómsveitarinnar The Fall. Þetta var með skrýtnari tónleikaupplifunum sem undirritaður hefur upplifað en skoðanir áhorfenda skiptust í andstæða póla um ágæti hennar. Smith ráfaði rallhálfur um sviðið og tuggði tyggjó af miklum móð milli þess sem hann spýtti textunum slefmæltur og drafandi út úr sér með óskiljanlegum Cockney hreim. Hljómsveitin hans var eins og vel smurð cadilac vél og dúndraði út groddaralegu póstpönki en Smith gerði hins vegar allt sem í hans valdi stóð til að angra þau.

Hann sparkaði niður trommumækum, glamraði á hljómborð, hækkaði og lækkaði í hljóðfærum á víxl og stundum bara ýtti hann við greyi hljóðfæraleikurunum. Hann virðist fara með hljómsveitina eftir „Ég á’etta, ég má’etta“ hugmyndafræði. Svo ekki sé minnst á að hann lítur út eins og Gollum og lét á köflum eins og sauðdrukkinn predikari. Hljómsveitin virtist gera sér fyllilega grein fyrir stöðu sinni í bandinu sem þrælar og voru ótrúlega þolinmóð gagnvart þessari fautalegu framkomu. Ég er kannski svona illa innrættur en ég hafði bara nokkuð gaman að sjónarspilinu. Þetta var allavega eitthvað sem maður sér ekki á hverjum degi.

Leðjan langt frá botninum
Botnleðja hafa engu gleymt og rokkuðu af sér punginn fyrir nostalgíuþyrsta áhorfendur í skemmunni. Þeir renndu í gegnum marga af sínum helstu slögurum ásamt nokkrum nýjum lögum, meðal annars því seinasta, sem hljómaði eins og handboltasigursöngur þar sem þeir nutu aðstoðar kórs. Áhorfendur tóku hins vegar best við sér í lögunum af Drullumalli og ætluðu þá bókstaflega að ærast. Í einu laginu kom síðan plötusnúðurinn og fyrrum meðlimurinn Kristinn Gunnar Blöndal og refsaði hljóðgervlinum sínum eins og rauðhærðu stjúpbarni, og hreinlega nýddist á pitchbend hjólinu af fádæma krafti.

Sýrulegnir byssumenn frá San Fransisco
The Oh Sees er sérkennilegur kvartett frá San Fransisco sem spila afar hressilega blöndu af sækadelic og garage rokki. Leiðtogi hennar, John Dwyer, lítur út eins og „surfer dude“ og hefur mjög sérstakan stíl á gítarnum, heldur honum hátt uppi á brjóstkassanum og mundar hann eins og riffill. Oft brast á með villtum spunaköflum þar sem mörgum gítarstrengjum var misþyrmt í ofsafengnu sýrusulli. Dwyer var hinn reffilegasti á sviðinu og hrækti á gólfið meðan trommuleikarinn var sem andsetinn í tryllingslegum sólóum. Þetta var svo sannarlega skynörvandi reynsla og bestu tónleikarnir þetta kvöldið.

Stórskotahríð á hljóðhimnur

Ég var svo eftir mig eftir Oh Sees að Ham bliknuðu nokkuð í samanburðinum en skiluðu þó sínu á skilvirkan og harðnákvæman hátt eins og þeirra er von og vísa. Það var nokkuð farið að fækka í skemmunni þegar annar borgarfulltrúi kvöldsins, Einar Örn, steig á svið ásamt Ghostigital flokknum. Óhljóðadrifið tekknó-ið sem þeir framleiða er ekki allra en ég kann vel að meta svona árás á hljóðhimnurnar. Abstrakt ljóð Einars Arnars hafa verið áhugaverð síðan hann var í Purrkinum en línur eins og „Ég er með hugmynd. Hún er svo stór að mig verkjar í heilann,“ gætu þó líst tilfinningum þeirra sem minnstar mætur hafa á hljómsveitinni.

Fyrsta kvöld hátíðarinnar var í flestalla staði stórvel heppnað; hljómsveitirnar voru góðar, sándið frábært og andrúmsloftið inni og úti alveg einstaklega afslappað og ólíkt öðrum tónlistarhátíðum sem undirritaður hefur sótt. Það var ekki vesen eða leiðindi á nokkrum manni, en þeim mun meira um bros og almennilegheit og gæslan hafði greinilega ekki mikið að gera. Atlantic Studios hentar greinilega einstaklega vel til tónleikahalds og það er vonandi að hún verði nýtt betur til slíks í framtíðinni. Fylgist vel á með á straum.is því umfjöllun um seinna kvöld hátíðarinnar er væntanleg á morgun.

Davíð Roach Gunnarsson

 

Tónleikar helgarinnar 27.-29. júní

Þessa síðustu helgi júlímánaðar er margt um að vera í tónleikadeildinni en stærsti viðburðurinn er þó líklega All Tomorrow’s Parties hátíðin sem fram fer á varnarliðssvæðinu í Keflavík. Dagskrá hátíðarinnar má finna hér og umfjöllun straum.is um hátíðina má finna hér. Fréttamyndin er af tónleikum sýrurokksveitarinnar The Oh Sees sem spila á hátíðinni á föstudagskvöldið.

Fimmtudagur 27. júní

Þjólagasveitin Danielle Ate The Sandwich kemur fram ásamt Bluegrass-bandinu Illgresi á Loft Hostel í Bankastræti. Tónleikarnir hefjast klukkan 20:30 og aðgangur er ókeypis.

Meira af þjóðlagatónlist á hostelum því hin angurværa sveit Árstíðir slær upp tónleikum á Kex Hostel. Þeir hefjast klukkan 9 og eru einu tónleikar sveitarinnar þangað til hún kemur fram á Airwaves hátíðinni í lok október.

í dag hefst sumartónleikaröð Cafe Flóru árið 2013! Tónleik mætti kalla hagsmunasamtök fátækra tónlistarmanna í Reykjavík og á þessu kvöldi koma fram:

Tryggvi heiðar
Pocket
Brynja
Ósk
Þorgerður Jóhanna
Þorvaldur Sigurbjörn
Raffaella
FrankRaven
Tinna Katrín
Sebastian Storgaard

Föstudagur 28. júní

All Tomorrow’s Parties tónlistarveislan hefst á Faktorý þar sem ótal íslensk og erlend bönd koma fram en fulla dagskrá má nálgast hér. Tilkynnt var í dag að Botnleðja hefði bæst við dagskránna á föstudeginum og við vísum fólki á umfjöllun straums um erlendar hljómsveitir hátíðarinnar hér.

Jaðarpoppdúettinn Nolo heldur tónleika í hliðarsal hins frábæra tónleikastaðar Faktorý, sem mun því miður verða jafnaður við jörðu von bráðar. Nolo segjast spila alla þá tónlist sem þeir komast upp með en hljóðfæra-skipan þeirra hefur tekið stakkaskiptum undanfarið, en í dag notast þeir við gítar, hljómborðs-syntha og HP-tölvu sem sér um ýmis hljóð, og jafnvel óhljóð. Sveitin gaf nýverið út plötuna Human á síðunni Bandcamp. Eftir tónleikana munu hljómsveitarmeðlimir þeyta skífum í hliðarsalnum ásamt Dj Alex J.E. a.k.a. Bob Blondie. Aðgangur er ókeypis og Nolo fara á svið klukkan 23:00.

Raftónlistarmaðurinn GERFiSykur spilar á Prikinu. Leikar hefjast klukkan 22:00 og það er ókeypis inn eins og venjulega.

Laugardagur 29. júní

All Tomorrow’s Parties hátíðin verður áfram í blússandi gangi á laugardagskvöldinu en þar er Nick Cave & The Bad Seeds stærsta númerið.

Pollock bræðurnir eru lifandi goðsagnir í íslensku tónlistarlífi en þeir koma fram á tónleikum á Dillon. Þessir andlegu stríðsmenn og brautryðjendur í pönki lofa andlegri upplifun og engum aðgangseyri. Tónleikarnir hefjast klukkan 22:00.

Erlendu sveitirnar á ATP

Það hefur varla farið framhjá tónlistaraðdáendum og lesendum þessarar síðu að fyrsta útgáfa All Tomorrow’s Parties tónlistarhátíðarinnar verður haldin á varnarliðssvæðinu í Keflavík eftir tvo daga. Hátíðin er orðin þekkt vörumerki í tónlistarheiminum og er um margt ólík öðrum festivölum sem er hægt að finna í tugatali í bæði Evrópu og Bandaríkjunum á hverju sumri. Sérstaða hennar felst einna helst í vinalegu andrúmslofti, þar sem allar hljómsveitir gista á svæðinu þar sem hátíðin er haldin og leitast er við að má út landamæri milli almennra gesta og tónlistarmannanna, og er þess vegna ekkert VIP svæði á hátíðinni. Annað sem hátíðin sker sig úr fyrir er að allar hljómsveitirnar spila tónleika því sem næst í fullri lengd, en ekki þessi hálftíma til 45 mínútna „festival-slot“ eins og á venjulegum hátíðum.

Þá leggur ATP mikið upp úr annars konar dægradvöl á meðan hátíðinni stendur og má þar nefna kvikmyndasýningar í Andrews Theater þar sem Jim Jarmusch og Tilda Swinton velja kvikmyndir, fótboltaleiki á milli hljómsveita á aðdáenda, og popppunktskeppni sem Dr Gunni mun halda. Að lokum má nefna að matur verður seldur á hátíðarsvæðinu svo gestir þurfa í raun ekki að leita neitt annað á meðan hátíðinni stendur. Enn er hægt að kaupa bæði helgar- og dagpassa á hátíðina á midi.is og straum.is hvetur lesendur sína til að láta þessa einstöku upplifun ekki framhjá sér fara. Fulla dagskrá hátíðarinnar má finna hér og margar af bestu hljómsveitum Íslands koma fram. Hér að neðan er hins vegar stutt kynning og tóndæmi á þeim erlendu hljómsveitum sem munu stíga á stokk.

Nick Cave & The Bad Seeds

Nick Cave er algjör óþarfi að kynna en við gerum það bara samt. Hann hefur í hátt í þrjá áratugi framleitt hágæða rokk, pönk og myrkar ballöður, með Birthday Party og Grinderman, undir eigin nafni með og án Slæmu Fræjanna, en sú frægasta sveit hans verður einmitt með honum í för á All Tomorrow’s Parties. Um tónleika fárra núlifandi listamanna hefur undirritaður heyrt ausið jafn miklu lofi og Nick Cave en hann hefur spilað þrisvar áður á Íslandi. Hér að neðan má heyra útgáfu hans af hinu frábæra Velvet Underground lagi sem ATP hátíðin tekur nafn sitt frá.

Thee Oh Sees

Thee Oh Sees er sækadelik sýrurokkssveit frá San Fransisco og hefur orð á sér að vera ein besta tónleikasveit heims um þessar mundir. Sveitin spilar í Atlantic Studios klukkan 00:15 á föstudagskvöldinu á undan íslensku rokkrisunum í Ham. Lagið Flood’s New Light er frábært lag sem krystallar kraftinn í bandinu.

SQÜRL

Leikstjórinn Jim Jarmusch hefur alltaf haft gott eyra fyrir töffaralegri músík til að setja í bíómyndirnar sínar og hefur í þeim tilgangi meðal annars leitað til RZA úr Wu Tang í Ghost Dog og Neil Young í Dead Man. Hann er nú kominn með sína eigin hljómsveit og sándið er alveg jafn svalt og myndirnar hans, töffaralegt og útúrfözzað gítarsurg. Þetta er rokktónlist sem tekur aldrei niður sólgleraugun.

The Notwist
Þýska indíbandið The Notwist hefur í hátt í 20 ár verið eitt helsta flaggskip Morr-útgáfunnar sem einnig hefur gefið út íslensku sveitirnar Múm og Sing Fang. Sveitin leikur skemmtilega fléttu af indírokki með rafáhrifum sem má heyra glöggt í laginu One With The Freaks af plötu þeirra Neon Golden frá 2002.

Deerhoof

Deerhoof hefur ferðast um lendur óhlóðarokks, indí og hugvíkkandi strauma á tveggja áratuga ferli og enginn hefur getað séð fyrir hvert hljómsveitin fer næst. Þeir sóttu Ísland heima á Iceland Airwaves hátíðina árið 2007 og þóttu tónleikarnir sérdeilis vel heppnaðir.

Chelsea Light Moving

Eftir að upp úr slitnaði hjá Sonic Yoth hjónakornunum tók Thurston Moore sig til og stofnaði nýtt band, Chelsea Light Moving. Þar heldur hann áfram þar sem frá var horfið með Sonic Youth, í því að misþyrma rafmagnsgíturum af öllum stærðum og gerðum og framleiða úrvalshávaða með melódískum þræði. Á fyrstu plötu sveitarinnar sem kom út í byrjun árs er talsverðra áhrifa að gæta frá pönki og harðkjarnatónlist.