Off-Venue dagskráin á Iceland Airwaves hefur nú verið gerð opinber og hefur hún aldrei verið viðameiri. Yfir 600 tónleikar eru í boði á tæplega 50 tónleikastöðum svo þeir sem ekki náðu í miða á hátíðina sjálfa ættu ekki að örvænta, heldur reyna að upplifa Airwaves stemmninguna off-venue, alveg ókeypis. Þar má meðal annars finna stórgóða erlenda flytjendur eins og Mac DeMarco, sem þessi vefsíða mælir sérstaklega með, en dagskrána má nálgast hér.
Mynd: Alexander Matukhno.
Fimmtudagur 10. október
Hljómsveitin Oyama snýr aftur til leiks eftir langan sumardvala með tónleikum á Gamla Gauknum ásamt Pétri Ben og Mammút. Staðurinn opnar kl. 21:00 og tónleikar hefjast stundvíslega kl. 22:00. Það kostar 1000 kr inn.
Japam og Good Moon Deer koma fram á Kex Hostel. Tónleikarnir hefjast klukkan 21:00 og það er frítt inn
Hljómsveitin Eva heldur ókeypis tónleika á Stúdentakjallaranum sem hefjast klukkan 20:00
Föstudagur 11. október
Leaves verða með hlustunarteiti á Boston fyrir plötuna “See you in the Afterglow” sem kemur út sama dag. Teitið hefst klukkan 20:00.
Einar Lövdahl blæs til útgáfutónleika í Tjarnarbíó þar sem öll lög plötunnar “Tímar án ráða” verða flutt. Húsið opnar kl. 20:30
Tónleikar hefjast kl. 21:30 Upphitun verður í höndum tónlistarmannsins Auðuns. Miðaverð er 1.500 kr. en hægt verður að kaupa miða og geisladisk á 2.500 kr.
Mánaðarlegur reggae/dub/dancehall viðburður RVK Soundsystem verður haldinn á Kofanum. RVK Soundsystem (Gnúsi Yones, DJ Elvar, DJ Kári, Arnljótur, Teitur, Kalli Youze) Það er frítt inn og fjörið hefst um 22:00.
Gítarhetjan Steve Vai spilar á tónleikum í Silfurbergi Hörpu. Miðaverð er 8990 og hefjast tónleikarnir á slaginu 22:00.
Laugardagur 12. október
Hljómsveitirnar Morning After Youth og Þausk koma fram á mánaðarlegu jaðarkvöldi á Kaffi Hressó. Tónleikarnir hefjast klukkan 22:30 og það er frítt inn.
James Murphy, fyrrum forsprakki LCD Soundsystem, hefur nú endurhljóðblandað Love is Lost, lag aldraða kamelljónsins Davið Bowie. Lagið er af endurkomuplötu Bowie, The Next Day, sem kom út í febrúar á þessu ári og endurhljóðblöndunina verður að finna á viðhafnarútgáfu plötunnar sem kemur út 5. nóvember. Þeir kumpánar unnu síðast saman að gerð lagsins Reflektor með Arcade Fire með afar góðum árangri. Í meðförum Murphy verður Love is Lost að tíu mínútna melankólískum diskósmelli sem heldur blúsuðu píanói upprunalegu útgáfunnar en bætir við ofsafengnum klapptakti og speisuðuem hljóðgervlum ásamt fleiru. Hlustið á lagið hér fyrir neðan.
Tónlistarmanninum Úlfi Alexander Einarssyni er margt til lista lagt. Auk þess að spila á gítar í hinni margmennu hljómsveit Útidúr þá þenur hann einnig raddbönd og spilar á gítar fyrir hljómsveit sína Oyama. Úlfur hefur spilað á Iceland Airwaves frá árinu 2008 og mun koma fram með Útidúr og Oyama á hátíðinni í ár.
Hvernig var þín fyrsta upplifun af því að spila á Airwaves?
Ég spilaði í fyrsta skipti á Airwaves árið 2008. Þá spilaði ég á Hressó með hljómsveitunum Fist Fokkers og Swords of Chaos. Það var geggjað. Ég man að mér leið eins og ég væri algjör rokkstjarna að vera að spila á Airwaves.
Hvað eru eftirminnilegustu tónleikarnir sem þú hefur sótt sem gestur?
Final Fantasy 2008 og Dirty Projectors 2012.
Hvað eru eftirminnilegustu tónleikarnir sem þú hefur spilað á sjálfur?
Á Nasa með tveggjamanna pönk bandinu mínu Fist Fokkers árið 2010. Okkur fannst bara svo súrt og geðveikt að vera bara eitthvað tveir að rokka jafn stórum stað og Nasa. Já og líka Fist Fokkers á Amsterdam 2011! Þar tókum 5 cover lög í bland við lögin okkar. Staðurinn alveg pakkaður og við fórum yfir tímann okkar og það átti að slökkva á okkur áður en við gætum tekið seinasta lagið okkar en áhorfendurnir voru alveg brjálaðir og ég hljóp baksvið og fann norska bandið sem var að spila á eftir okkur og fékk leyfi frá þeim til að spila lengur og já. Það var bara geðveik stemning á þeim tónleikum, allir trylltir.
Hvernig finnst þér hátíðin hafa breyst og þróast í gegnum árin?
Mér finnst hún bara alltaf næs. Alltaf misstór útlensk bönd að spila, en það skiptir ekki máli. Hátíðin er alltaf skemmtileg.
Hvaða tónleikum sérðu mest eftir að hafa misst af ?
Daníel Bjarnason í Eldborg þegar hann var nýbúinn að gefa út Processions.
Hefurðu einhver góð ráð handa tónlistarmönnum sem eru að spila á Airwaves í fyrsta skiptið?
Spila líka á off-venue tónleikum! Þeir geta verið alveg jafn mikilvægir og on-venue tónleikarnir. Leggja líka metnað í það sem þú ert að gera! Þúst. KOMA SVO! HALLÓÓÓÓ!!!
Hverju ertu spenntastur fyrir á hátíðinni í ár? Erlent/innlent?
Mér finnst Mac Demarco og Anna von Haussvolff rosa skemmtileg. Síðan er Dj. Flugvél og Geimskip að fara gefa út nýja plötu og ég hlakka rosa mikið til að tékka á því. Tónleikar með Dj. F & G eru alltaf næs.
Hvaða þýðingu hefur Iceland Airwaves fyrir íslensku tónlistarsenuna?
Airwaves heldur rosa miklu lífi í íslensku tónlistarsenunni. Líka góður stökkpallur fyrir íslensk bönd.
Hvaða beinu áhrif hefur hátíðin haft fyrir þig og þína hljómsveit/hljómsveitir?
Airwaves hefur hjálpað þeim hljómsveitum sem ég er í alveg gríðarlega. Við erum að fá erlenda fjölmiðlaumfjöllun sem við hefðum annars ekki verið að fá og höfum myndað sambönd sem hafa gert það að verkum að við höfum farið að spila útum allan heim. T.d. þá fór hljómsveit sem ég er í, Útudúr, í mánaðarlangt tónleikaferðalag yfir allt Kanada í fyrra með kanadíska bandinu Brasstronaut af því að við kynntumst söngvaranum þegar þeir voru að spila hérna og héldum síðan góðu sambandi eftir það.
Hvað hefur þú spilað mest á mörgum tónleikum yfir eina hátíð?
2010 spilaði ég 11 tónleika með 3 mismunandi hljómsveitum.
Kraftwerk eða Yo La Tengo?
Kraftwerk. (en þúst ég elska líka Yo La Tengo)
Listasafnið eða Harpa?
Mmm.. Listasafnið af því að ég á fleirri góðar minningar þaðan.
Með hvaða hljómsveit/hljómsveitum ertu að spila á þessari hátíð og hvar er hægt að fylgjast með þér?
Ég er að spila með Oyama og Útidúr.
Nú hafa fyrstu listamennirnir sem munu spila á næstu Sónar hátíð í Reykjavík verið tilkynntir og þar ber hæst Major Lazor hópinn sem leiddur er af Diplo. Lagið Get Free var feikivinsælt á síðasta ári og að mati þessarar síðu annað besta lag ársins, og platan Free The Universe sem kom út í byrjun þessa árs var reggískotinn partýbræðingur af bestu sort. Þá mun Daphni koma fram á hátíðinni, en það er hliðarverkefni Daniel Snaith sem er best þekktur sem Caribou, en hann sótti Ísland heim undir því nafni árið 2011 og hélt stórbrotna tónleika á Nasa. Þá hefur þýski plötusnúðurinn Kölsch verið bókaður og íslensku sveitirnar Hjaltalín, Sykur og Sometime hafa verið staðfestar. Sónar hátíðin fer fram í Hörpu dagana 13. til 15. febrúar næstkomandi en hún var fyrst haldin hér á landi í febrúar á þessu ári en umfjöllun straum.is um hátíðina má nálgast hér. Miðasala á hátíðina fer fram á midi.is og hægt er að hlusta á Major Lazer og Daphni hér fyrir neðan.
Í Straumi í kvöld heyrum við nýtt efni með Darkside, Four Tet, Teen Daze, Destroyer, Baio og mörgum öðrum. Straumur með Óla Dóra í kvöld klukkan 23:00 á X-inu 977!
Straumur 7. október 2013 by Straumur on Mixcloud
1) The Night Comes Again – St. Lucia
2) Wait For Love – St. Lucia
3) Indian Summer – Blood Cultures
4) The Only Shrine I’ve Seen – Darkside
5) Freak, Go Home – Darkside
6) Autumnal – Teen Daze
7) Peppermint – Julio Bashmore
8) Dust in the gold sack – Swearin
9) Mean Street – Tennis
10) El Rito – Destroyer
11) Unicorn – Four Tet
12) Mira – Baio
13) Tiger Kit – Sleigh Bells
14) Baby Mae – Those Darlins
15) Western Sky – Those Darlins
Tónlistarmaðurinn Jón Þór Ólafsson hefur margoft spilað á Iceland Airwaves bæði með hljómsveitum og með sólóverkefni sínu. Jón Þór kemur fram með hljómsveit sinni Love & Fog á hátíðinni í ár.
Hver var fyrsta Airwaves hátíðin sem þú fórst á sem gestur og hvað var eftirminnilegast á henni?
Airvaves árið 2003 var fyrsta hátíðin sem ég spilaði á og naut sem gestur. Ég skemmti mér vel á á Nasa. Trabant voru góðir en The Kills voru lummó. Ég spilaði í fyrsta skipti á Airwaves þá á gítar með íslenska raftónlistarmanninum Tonik. Ég man ómögulega hvar þeir voru en stemmingin var örugglega góð. Það er alltaf góð stemming á Tonik.
Á hversu mörgum hátíðum hefur þú spilað?
Hátíðin í ár er tíunda IE hátíðin sem ég spila á. Það hlýtur að þýða að hún verði magiKul!!!
Hvað eru eftirminnilegustu tónleikarnir sem þú hefur sótt sem gestur?
Foreign Monkeys árið 2009 eru í fljótu bragði eftirminnilegastir. Líklega út af því að ég endaði inni í trommusettinu í lokalaginu þeirra.
Hvað eru eftirminnilegustu tónleikarnir sem þú hefur spilað á sjálfur?
Það er erfitt að velja eftirminnilegustu tónleika sem ég hef spilað sjálfur á. Það var rosalega gaman að spila með Lada Sport árið 2006. Þá vorum við nýbyrjaðir að taka upp plötuna okkar Time And Time Again og blésum upp tvöhundruð hjartalaga blöðrur sem gengu á milli áhorfenda á Grand Rokk. Einnig eru off-venjú tónleikarnir Mjódd-waves á föstudeginum í fyrra frábærir. Ég var að spila órafmagnað sett af sólóskífunni minni. Óveðrið var þá sem mest, alveg brjálað rok og nötrandi kuldi. Gluggarnir sveifluðust til og kannski 15 manns að horfa á.
Hvernig finnst þér hátíðin hafa breyst og þróast í gegnum árin?
Hátíðin hefur aðallega verið að festa sig í sessi sem ein magnaðasta tónlistarhátíð í heimi. Hún hefur alltaf haldið fjölbreytileika sínum og mikið af sama fólki kemur til landsins ár eftir ár og sækir hátíðina vegna þess að andrúmsloftið í miðbænum er rafmagnað og nánast ólýsanlegt. Fólk gengur brosandi um með stjörnur í augunum.
Hvað er uppáhalds tónleikastaðurinn þinn?
Nasa er besti tónleikastaður sem íslendingar hafa átt og munu nokkurn tíma eiga. Það er virkilega grátlegt að missa hann.
Hvaða tónleikum sérðu mest eftir að hafa misst af ?
Ég hef, eins og væntanlega margir, misst af mörgum geðveikum tónleikum. Mest sé ég þó eftir að hafa misst af Vampire Weekend og Klaxons.
Hefurðu einhver góð ráð handa tónlistarmönnum sem eru að spila á Airwaves í fyrsta skiptið?
Já, vertu þú sjálf(ur) og skemmtu þér vel.
Hverju ertu spenntust/spenntastur fyrir á hátíðinni í ár? Erlent/innlent?
Ég er spenntur að sjá Mac DeMarco, auk þess sem Yo La Tengo mun eiga fimmtudaginn fyrir mér. Af íslenskum böndum sé ég sjaldnast það sem ég ætla mér að sjá en oftast sé ég vini og kunningja búa til e-ð gúmmelaði.
Hvaða þýðingu hefur Iceland Airwaves fyrir íslensku tónlistarsenuna?
Íslenska tónlistarsenan er líklega sífellt að snúast meir og meir í kringum hátíðina í stað þess að hátíðin sé að snúast í kringum tónlistarsenuna. Það er örugglega bara kostur frekar en galli því hljómsveitir og listamenn reyna oft að koma plötum og afurðum sínum út í kringum hátíðina. Iceland Airwaves er þar af leiðandi ákveðinn hápunktur á tónlistarárinu, í senn drifkraftur og uppskeruhátíð.
Hvað hefur þú spilað mest á mörgum tónleikum yfir eina hátíð?
Ég held að ég hafi spilað á níu tónleikum á hátíðinni í fyrra. Það var gaman!
Uppáhalds Iceland Airwaves hátíðin þín í gegnum árin? Af hverju?
Hátíðin í fyrra er í miklu uppáhaldi. Óveðrið gerði hana extra eftirminnilega.
Kraftwerk eða Yo La Tengo?
Bæði! En ég sá Kraftwerk 2004 í Kaplakrika þannig að í ár heyri ég Yo La Tengo hjartað slá sem eitt!
Listasafnið eða Harpa?
Listasafnið
Með hvaða hljómsveit/hljómsveitum ertu að spila á þessari hátíð og hvar er hægt að fylgjast með þér?
Ég er að spila með Love & Fog á Harlem á miðvikudagskvöldinu og á Hressó á fimmtudagskvöldinu. Off-venjú á eftir að koma í ljós.
Sóley Stefánsdóttir byrjaði feril sinn í hljómsveitinni Seabear og spilaði í fyrsta skiptið á Iceland Airwaves með henni árið 2008. Fyrsta útgáfa Sóley Theater Island EP kom út árið 2010 og platan We Sink fylgdi í kjölfarið árið 2011. Frá útgáfu hennar hefur Sóley vakið mikla athygli utan landsteinana og ferðast með tónlist sína vítt og breitt um heiminn. Sóley situr fyrir svörum í Airwaves yfirheyrslu dagsins.
Hver var fyrsta Airwaves hátíðin sem þú fórst á sem gestur og hvað var eftirminnilegast á henni?
Áður en ég varð tvítug þá þræddi ég OFF venjú tónleika airwaves og mér eru minnistæðastir tónleikar Hot Chip í 12 tónum árið 2005, mér fannst þeir algjör snilld og fyrsta platan þeirra er líka tryllt!
Hvernig var þín fyrsta upplifun af því að spila á Airwaves?
Það var í Listasafni Reykjavíkur árið 2008 með hljómsveitinni Seabear. Það var geðveikt gaman, við vorum reyndar nýkomin af frekar brjáluðu 5 vikna tónleikaferðalagi (þar sem Ísland hrundi á meðan!) en það var mjög gaman að loka þeim túr með skemmtilegum tónleikum í Listasafninu, fullt af fólki og brjáluð stemning (allavega í minningunni)!
Á hversu mörgum hátíðum hefur þú spilað?
Ég hef spilað síðan 2008, 5 hátíðum.
Hvað eru eftirminnilegustu tónleikarnir sem þú hefur sótt sem gestur?
Bara ef ég hugsa til ársins í fyrra þá voru Dirty Projectors svo fáránlega góð læv að ég bara stóð og gapti…
Hvað eru eftirminnilegustu tónleikarnir sem þú hefur spilað á sjálf?
Mér fannst mjög gaman í fyrsta skipti sem ég spilaði sóló dótið mitt en það var í Kaldalóni árið 2011, alveg stappfullur salur og ég að spila músíkina mína í fyrsta skipti á íslandi. mjög gaman!
Hvað er uppáhalds tónleikastaðurinn þinn?
Mér finnst Iðnó alltaf rosa sjarmerandi staður.
Hvaða tónleikum sérðu mest eftir að hafa misst af ?
Beach House árið 2011, ég var að spila á sama tíma með Sin Fang.
Hefurðu einhver góð ráð handa tónlistarmönnum sem eru að spila á Airwaves í fyrsta skiptið?
Uhh hafa gaman!
Hverju ertu spenntust fyrir á hátíðinni í ár? Erlent/innlent?
Ég er mjög spennt að sjá múm og sænsku tónlistarkonuna Anna Von Hauswolf, Yo La tengo og Krafwerk ef ég fæ miða. Líka Omar souleyman bara afþví hann heitir næstum því sóley, djók. En ég er ekki alveg búin að kíkja nógu vel á þetta…
Hvaða þýðingu hefur Iceland Airwaves fyrir íslensku tónlistarsenuna?
Þetta er náttúrulega fyrst og fremst árshátíð fyrir tónlistarsenuna á Íslandi. Og svo eru nú alltaf eitthvað bisness fólk í salnum og ég vinn til dæmis núna með rosa fínum bókara sem mætti á tónleika með mér í fyrra.
Hvaða beinu áhrif hefur hátíðin haft fyrir þig og þína hljómsveit/hljómsveitir?
Bara allt þetta örugglega. Ég hef verið svo heppin að ég er búin að vera að túra síðan fyrsta platan mín kom út árið 2011 og það er kannski svoldið erfitt að segja hvað kemur beint í gegnum Iceland Airwaves en ég held að þetta tengist allt. Fólk kemur og sér tónleika, segir fleira fólki frá eða bransa fólk sem hefur samband eftir hátíðina…
Uppáhalds Iceland Airwaves hátíðin þín í gegnum árin? Af hverju?
Þær hafa allar sinn sjarma og góðu minningar…
Kraftwerk eða Yo La Tengo?
uhhh, þetta er svolítið eins og að spyrja mig hvort mér finnist súkkulaði eða sushi betra. bæði betra!
Listasafnið eða Harpa?
Fer algjörlega eftir tónlistinni, partýið í Listasafninu og allskonar í Hörpu.
Með hvaða hljómsveit/hljómsveitum ertu að spila á þessari hátíð og hvar er hægt að fylgjast með þér?
Í ár er ég bara að spila með sjálfri mér (sóley) og það verður bara hægt að fylgjast með á facebook: www.facebook.com/soleysoleysoley
Mynd: Sebastien Dehesdin
Hér verður veitt heildarinnsýn inn í allt það markverðasta í tónleikahaldi á höfuðborgarsvæðinu um helgina. Njótið á eigin ábyrgð og gangið greiðlega um gleðinnar dyr.
Fimmtudagur 3. október
Hljómsveitin Grísalappalísa mun stíga á stokk í verslunarkjarnanum Mjóddinni í Mjóddinni. Tónleikarnir eru hugsaðir sem menningarinnslag Grísalappalísu til Breiðholtsins en þeir hefjast klukkan 18:00 og aðgangur að þeim er ókeypis.
Fönkkvöld verður haldið á Gauk á Stöng en þar verður á boðstólum sálarfull angist frá Fox Train Safari, skaðræðisfönk frá helvíti í boði Óreglu og groovy goodness frá krökkunum í Babies, sem loka kvöldinu. Aðgangseyrir er 1000 krónur og tónleikarnir hefjast klukkan 22:00.
Föstudagur 4. október
Á undiröldunni, tónleikaröð Hörpu og 12 tóna, koma fram noise- og raffrumkvöðlarnir í Stilliuppsteypu og einyrkinn Rafsteinn. Aðgangur að tónleikunum er að venju ókeypis og þeir hefjast klukkan 17:30.
Plötusnúðatvíeykið It Is Magic kemur fram í hliðarsal Harlem en þeim til halds og traust verða strákarnir í Nolo. Fyrstu skífunni verður þeytt á slaginu 22:01 og dansinn mun duna eins lengi og lög um vínveitingar leyfa, eða til 04:30.
Kvikmyndin Days of Gray verður frumsýnd á RIFF kvikmyndahátíðinni í Gamla bíói á Ingólfsstræti. Myndin er þögul en hljómsveitin Hjaltalín samdi tónlist við hana og mun í þetta eina skipti flytja tónlistina live við myndina. Kvikmyndatónleikarnir hefjast klukkan 21:00 og miðaverð er 2900 kr. en passahöfum á RIFF býðst miðinn á 2400.
Laugardagur 5. október
Á þessum degi eru 50 ár síðan Hljómar komu fram á sínu fyrsta balli og í tilefni þess er blásið til stórtónleika til heiðurs sveitarinnar í Eldborgarsal Hörpu. Tónlistarstjóri er Eyþór Gunnarsson en um söng sjá Stefán Hilmarsson, Valdimar Guðmundsson, Unnsteinn Manuel og Ágústa Eva Erlendsdóttir. Sérstakir gestir verða hinir upprunalegu Hljómar; Engilbert Jensen, Gunnar Þórðarson, Erlingur Björnsson ásamt syni Rúnars Júl, Júlíus Frey Guðmundssyni. Tónleikarnir hefjast klukkan 20:00 og miðaverð er frá 4990 til 10990 eftir sætum.
Jackass-æringinn Bam Margera býður í brúðkaupsveislu og tónleika til styrktar hjólabrettamenningu í Reykjavík. Veislan verður haldin í Hafnarhúsinu og fram koma Endless Dark, Kaleo, Emmsjé Gauti, SÍSÍ EY og Fuckface Unstoppable. Tónleikarnir hefjast 21:00 og aðgangseyrir er 3500 krónur.
Hljómsveitin Nolo spilaði fyrst á Iceland Airwaves árið 2009 þá sem tvíeyki. Nú hafa þeir félagar bætt við sig þriðja meðlimnum sem spilar á trommur. Við kölluðum Ívar Björnsson hljómborðsleikara hljómsveitarinnar til yfirheyrslu og spurðum hann út í reynslu hans af Iceland Airwaves.
Hver var fyrsta Airwaves hátíðin sem þú fórst á sem gestur og hvað var eftirminnilegast á henni?
Fyrsta Airwaves hátíðin sem ég fór á var einmitt árið 2009 þegar Nolo var rétt að byrja. Við höfðum aldrei farið áður á hátíðina sem gestir og það eftirminnilegasta var sennilega að spila fyrir fullu húsi í brjálaðri stemningu, sem ný hljómsveit vorum við ekki vanir því.
Hvernig var þín fyrsta upplifun af því að spila á Airwaves?
Ég hef aðeins spilað á Airwaves með Nolo. Fyrsta Upplifunin var frábær og aðrar hljómsveitir eins og Sudden Weather Change hjálpuðu okkur að aðlagast nýjum aðstæðum. Það var gaman að kynnast svona mörgum hljómsveitum á stuttum tíma og maður lærði heilmikið eins og t.d. að hlaupa á milli tónleika og vera á 100% tempói yfir daginn að róta. Nolo hefur spilað frá því árið 2009 og er þetta fimmta hátíðin í röð sem við spilum á árið 2013.
Hvað eru eftirminnilegustu tónleikarnir sem þú hefur spilað á sjálfur?
Ég myndi segja fyrstu tónleikarnir okkar Nolo á Airwaves. Að spila fyrir fullu húsi (þá Grand Rokk) var bara sturlun og að heyra fólk syngja með lögunum okkar var eitthvað sem við vorum ekki vanir. Annars er líka gaman að segja frá því þegar við spiluðum í Listasafninu í fyrra en þá var einmitt hápunktur stormsins mikla í gangi. Þakið ætlaði að rifna af húsinu bókstaflega. Vindurinn var gríðarlegur og ekki mátti miklu muna að þakið myndi fjúka í sjóinn (sem hafði gerst víst áður…)
Hvað eru eftirminnilegustu tónleikarnir sem þú hefur sótt sem gestur?
Þeir eru nokkrir, Dirty Projectors í fyrra voru frábær og magnað að sjá hversu góð þau eru live. Neon Indian voru einnig mjög flottir ásamt Beach House sem maður heillast mikið af.
Hvernig finnst þér hátíðin hafa breyst og þróast í gegnum árin?
Það eru fleiri erlendar sveitir og ferðamenn að bætast inn á hátíðina ár eftir ár sem er bara gott. En Airwaves reynir alltaf að fá til sín efnilegar hljómsveitir sem eru við það að „meika það“ og það held ég að hafi ekkert breyst í gegnum síðustu ár. Ég myndi segja að þróunin hafi verið góð þessi 5 ár sem ég hef tekið þátt í.
Hvað er uppáhalds tónleikastaðurinn þinn?
Það var mjög gaman að spila í salnum Kaldalón í Hörpunni árið 2011. Svo er Listasafnið einnig frábær staður til þess að spila á en við vorum einmitt þar í fyrra og endurtökum leikinn nú í ár.
Hvaða tónleikum sérðu mest eftir að hafa misst af ?
Engum, nema það þegar The Rapture komu hingað og spiluðu á Airwaves (2002) en maður var þá alltof ungur.
Hefurðu einhver góð ráð handa tónlistarmönnum sem eru að spila á Airwaves í fyrsta skiptið?
Að hafa gaman, ekki stressa sig of mikið, spila hæfilega oft (þá með Off Venue) og kynnast hljómsveitum því maður lærir alltaf eitthvað á því.
Hvað hefur þú spilað mest á mörgum tónleikum yfir eina hátíð?
Við höfum alltaf verið að taka svona 3-4 gigg í gegnum árin en núna gæti metið verið slegið þar sem með öllu töldu þá gætu tónleikar okkar verið um 5-6 talsins.
Hverju ertu spenntastur fyrir á hátíðinni í ár? Erlent/innlent?
Erlent er það Omar Souleyman og Kraftwerk en innlent er það sennilega FM Belfast, Loji, M-Band, Grísalappalísa, Oyama og Prins Póló.
Hvaða þýðingu hefur Iceland Airwaves fyrir íslensku tónlistarsenuna?
Þessi hátíð er gríðarlega mikilvæg fyrir íslensku tónlistarsenuna. Hún gefur nýjum hljómsveitum og tónlistarmönnum tækifæri til þess að sanna sig og fá athygli erlendis. Þetta er algjör stökkpallur fyrir hljómsveitir hér á landi, maður veit aldrei hver er að horfa á tónleikana.
Hvaða beinu áhrif hefur hátíðin haft fyrir þig og þína hljómsveit?
Nolo hefur fengið einhverja erlenda umfjöllun og fyrirspurnir en engin stórtíðindi.
Uppáhalds Iceland Airwaves hátíðin þín í gegnum árin?
Ég get eiginlega ekki gert upp á milli hátíða. Kannski að hátíðin í ár verði sú uppáhalds?
Með hvaða hljómsveit/hljómsveitum ertu að spila á þessari hátíð og hvar er hægt að fylgjast með þér?
Ég er að spila með Nolo og við komum fram á Harlem kl 23:20 á miðvikudeginum og svo í Listasafninu kl 20:00 á laugardeginum. En Off Venue erum við staðfestir á Dillon, Bar 11, Reykjavík Backpackers og Kex Hostel.
Eitthvað sem þú villt koma á framfæri að lokum?
Ást og frið
