Airwaves yfirheyrslan – Stafrænn Hákon

Ólafur Örn Josephsson tónlistar­maður hefur gefið út tónlist undir listamannsnafninu Stafrænn Hákon frá árinu 1999 og spilaði í fyrsta skipti á Iceland Airwaves 2001. Ólafur ræddi við okkur um Airwaves og bandið sitt Stafrænan Hákon.

 

Hver var fyrsta Airwaves hátíðin sem þú fórst á sem gestur og hvað var eftirminnilegast á henni?

Fyrsta hátíðin árið 1999 í einhverju flugskýli .. voru tvö bönd að mig minnir, Gus Gus og Sigur Rós. Bæði frekar eftirminnilegt

 

Hvernig var þín fyrsta upplifun af því að spila á Airwaves?

Spilaði fyrsta skiptið árið 2001, þá með hljómsveitinni Ampop.  Það var á Kaffi Thomsen og það var svaka stuð. Fullt af fólki og allir frekar sáttir enda mjög spennandi allt saman.

Á hversu mörgum hátíðum hefur þú spilað?

hmmmm….. 2001, 2007, 2010, 2011 og 2012,  þannig að núna árið 2013 er 6. skiptið.

Hvað eru eftirminnilegustu tónleikarnir sem þú hefur sótt sem gestur?

Margir mjög góðir sem maður hefur dottið inná. Man hversu Sigur Rós voru góðir í Hafnarhúsinu árið 2001 enda frekar heitir á þeim tíma.  Svo voru Deerhof árið 2007 helvíti magnað.  Annars Heavy Experience árið 2011 á Amsterdam eitt það eftirminnilegasta af þessu.


Hvað eru eftirminnilegustu tónleikarnir sem þú hefur spilað á sjálfur? 

Það var sennilega árið 2011 með hljómsveitinni Náttfara í Norðurljósum í Hörpunni.  Magnað sánd og manni leið virkilega vel það kvöldið á sviðinu.

 

Hvernig finnst þér hátíðin hafa breyst og þróast í gegnum árin?

Hún stækkar og stækkar með hverju árinu virðist vera. Og ekki verra að alltaf verið að batna til muna aðstæður og fleira í þeim dúr.  Virkilega vel framkvæmd í gangi hjá fólkinu sem skipuleggur og leggur hönd á plóg. Get ekki ímyndað mér haustmánuði án þessarar hátíðar.

 

Hvað er uppáhalds tónleikastaðurinn þinn?

Amsterdam auðvitað og svo náttla Iðnó alltaf góður. 

 

 Hefurðu einhver góð ráð handa tónlistarmönnum sem eru að spila á Airwaves í fyrsta skiptið?

Njóta þess að spila og gefa sig 110% í þetta stöff… annars er þetta vonlaust og hælarnir kælast fljótt.

 

Hverju ertu spenntastur fyrir á hátíðinni í ár? Erlent/innlent?

Yo La Tengo (séð áður en alltaf til í meira, eitt það magnaðasta tónleikaband sem ég hef upplifað.) Nolo með trommara og Stroff auðvitað.

 

 

Hvaða þýðingu hefur Iceland Airwaves fyrir íslensku tónlistarsenuna?

Gríðarlega mikilvægt fyrir íslenska tónlistarmenn að fá tækifæri til að koma fram á svona glæsilegri hátíð. Ekki sjálfgefið og það ætti að halda flestum á tánum.  Þetta er orðinn heljarinnar megamessa í íslensku listalífi, svo einfalt er það.

 

Hvað hefur þú spilað mest á mörgum tónleikum yfir eina hátíð? 

Í fyrra var það 5 sinnum með offvenue.. það var feikinóg.

 

 Uppáhalds Iceland Airwaves hátíðin þín í gegnum árin? Af hverju?

allar góðar á sinn hátt.

 

Kraftwerk eða Yo La Tengo?

Yo La Tengo án vafa enda ennþá frekar fersk, Krafwerk gæti ég hugsað mér að sjá fyrir 35 árum.

 

Listasafnið eða Harpa?

Fer eftir atriðum.  Annars er ég yfirleitt með vonbrigðum með hljómburð í Listasafninu.

 

Með hvaða hljómsveit/hljómsveitum ertu að spila á þessari hátíð og hvar er hægt að fylgjast með þér?

Þetta skiptið er það bara Stafrænn Hákon.  Náttfari í fríi að mér skilst og Per:Segulsvið fær aldrei aðgang að slíkri hátíð.

Eitthvað sem þú villt koma á framfæri að lokum?

Já ætla að láta móðir mína sauma STROFF á allar flíkurnar mínar fyrir hátíðina, til að þrengja soldið að ökklum og úlnliðum.

 

 

Nýjasta plata Cut Copy aðgengileg

Fjórða breiðskífa Cut Copy flokksins, Free Your Mind, hefur verið smellt á heimasíðu hljómsveitarinnar og gerð aðgengileg til hlustunar. Áherslur plötunnar eru í takt við fyrra efni og enginn stökkbreyting á sér stað í þróun tónsmíða þó sýru hús tónlist fái aukið vægi að þessu sinni. 4 smáskífur af plötunni höfðu áður fengið að líta dagsins ljós en í heildina eru lögin 14. Dansþyrstir aðdáendur bandsins ættu að fá eitthvað fyrir sinn snúð þó þetta sé eitthvað frá því besta sem heyrst hefur frá sveitinni.

Airwaves viðtal: Mac Demarco

Þrátt fyrir að vera aðeins 23 ára gamall hefur Mac Demarco gefið út tvær sólóplötur og  fjórar aðrar með fyrrum hljómsveit sinni Makeout Video. Þegar við hringdum í Mac var hann að leggja lokahönd á sína þriðju plötu sem kemur út í apríl. Mac kemur fram í Hörpu Silfurberg laugardaginn 2. nóvember klukkan 21:00 og fyrr um daginn á off-venue M for Montreal í Stúdentakjallarnum klukkan 18:30. Við spurðum hann út í væntanlega plötu, senuna í Montreal þar sem hann bjó um skeið og líflega tónleikaframkomu.

 

 

 


Airwaves yfirheyrslan – Agnes í Sykur

Agnes Björt Andradóttir söngkona hljómsveitarinnar Sykur hefur vakið mikla athygli síðustu ár fyrir magnaða sviðsframkomu og feikna sterka rödd. Agnes spilar í ár á sinni þriðju Airwaves hátíð ásamt hljómsveit sinni Sykur.

 

Hver var fyrsta Airwaves hátíðin sem þú fórst á sem gestur og hvað var eftirminnilegast á henni? 

Það var árið 2008. Það sem var eftirminnilegast á hátíðinni það árið voru tónleikar hljómsveitarinnar Mae Shi sem er experimental indie band frá Los Angeles sem átti vel við litlu rebel Agnesi. Svo fór ég í eftirminnilegt pottapartí í ókunnugu húsi þar sem alklæðnaður var skylda, það er frekar ógirnilegt að fara í heitapott í gallabuxum ásamt 20 manns.


Hvernig var þín fyrsta upplifun af því að spila á Airwaves? 

Fyrsta skipti sem ég spilaði á airwaves var árið 2011. Það var sturluð upplifun. Við spiluðum á Nasa, klukkan 3, aðfaranótt sunnudags fyrir troðfullan sal af sveittu fólki sem þráði ekkert annað en að dansa og skemmta sér. Stemningin var helluð. Við komum með lítið brimbretti með okkur og Stefán sörfaði krádið. Þetta er í top 3 af skemmtilegustu giggum sem að ég hef einhverntíman spilað. R.I.P Nasa!

 

Á hversu mörgum hátíðum hefur þú spilað? 

Í ár er ég að spila á þriðju hátíðinni minni. Ég spilaði 2011 og 2012 með Sykur.


Hvað eru eftirminnilegustu tónleikarnir sem þú hefur sótt sem gestur? 

Mae Shi

 

Hvernig finnst þér hátíðin hafa breyst og þróast í gegnum árin?

Ég geri mér ekki alveg grein fyrir því af því að mér finnst ég hafa breyst svo mikið sjálf. En ég hef tekið eftir því að fleiri erlendir gestir hafa bæst í hópinn og stemningin og undirbúningurinn eykst með hverju árinu finnst mér. Fyrir mér hefur hátíðin stækkað og þetta er orðið bara svona eins og jólin eða páskarnir.

 

Hefurðu einhver góð ráð handa tónlistarmönnum sem eru að spila á Airwaves í fyrsta skiptið? 

Fyrst og fremst að vera prófessjonal, halda einbeitingu, sofa vel, ekki vera þunn/ur. Airwaves er hátíð þar sem fólk kemur saman, óháð aldri, búsetu eða whatever-the-shit-they’re-about með það eitt í huga að skemmta sér. Yfir krádinu ríkir ákveðið frelsi og jákvæðni. Þau gigg sem bjóða uppá þetta krád eru bestu giggin til að spila á, þau geta kennt manni svo margt á ljúfan máta. Ef þú ert að spila í fyrsta skipti á airwaves, njóttu þess og ekki vera feimin/n að leyfa sjálfum þér að upplifa þig eina/n af krádinu.

 

Hvaða þýðingu hefur Iceland Airwaves fyrir íslensku tónlistarsenuna?

Uppskera, árshátíð og góð tenging fyrir senuna út í heim.


Hvað hefur þú spilað mest á mörgum tónleikum yfir eina hátíð?  

Metið er minnir mig sjö tónleikar árið 2011. Við spilum fjóra tónleika í ár.

 

Kraftwerk eða Yo La Tengo? 

Kraftwerk

 

Listasafnið eða Harpa?

Fer eftir ýmsu

 

Með hvaða hljómsveit/hljómsveitum ertu að spila á þessari hátíð og hvar er hægt að fylgjast með þér? 

Ég er að spila með Sykur. Hérna er dagskráin okkar —

miðvikudagur = Jör klukkan 17:00 (off venue)

föstudagur = Þjóðleikhúskjallarinn klukkan 2:10

laugardagur = Laundromat Cafe klukkan 15:00 (off venue) og Harpa Norðurljós klukkan 00:40

 

 

Eitthvað sem þú villt koma á framfæri að lokum?

Hlakka til að sjá ykkur elskur! LET’S GO!

 

 

Boogie Trouble breiða yfir Britney

Diskóboltarnir í Boogie Trouble deildu ábreiðu sinni af Britney Spears slagaranum Toxic á Soundcloud síðu sinni í gær, fríkeypis til niðurhals og streymis. Það hefur síðustu misseri ómað ótt og títt á tónleikum sveitarinnar en í meðförum hennar er það grúvað allharkalega upp með skokkandi diskóbassa og suddalegum sörfgítar. Lagið er tilvalið veganesti inn í helgina og hægt er að hlusta á ábreiðuna, eða jafnvel setja hana á í partýi, hér fyrir neðan. It’s Britney, bitch!

Hlustið á nýjustu breiðskífu Arcade Fire

Nýjasta breiðskífa Arcade Fire, Reflektor, hefur nú verið gerð aðgengileg til streymis á youtube vefnum. Platan kemur opinberlega út á mánudaginn en datt á netið í dag og eru þetta væntanleg viðbrögð hljómsveitarinnar við lekanum. Heimasíða hljómsveitarinnar þar sem hlekkjað er á streymið liggur nú niðri, væntanlega vegna fjölda heimsókna, en lesendur geta sparað sér það vesen og streymt plötuna hér fyrir neðan.

Tónleikar helgarinnar

 

Fimmtudagur 24. október 

 

Ultra Mega Technobandið Stefán halda hlustunarpartí fyrir plötuna ! á skemmtistaðnum Harlem. Platan verður spiluð frá klukkan 9-10 á skemmtistaðnum Harlem og mun Thule sjá til þess að allir fái fríar drykkjarveigar á meðan birgðir endast.

Kristján Hrannar og Jakobsson koma fram í Stúdentakjallaranum. Tónleikarnir hefjast klukkan 20:00 og það er frítt inn. 

 

Útgáfutónleikar HEK vegna plötunnar Please tease me á Gamla Gauk  kl 22. Um upphitun sjá Gímaldin, Hr.Halli og María Viktoría. Húsið opnar kl 21 og verður nýi diskurinn til sölu á staðnum á sérstöku tilboði. Miðaverð er 1000 kr.

 

 

Föstudagur 25. október

 

Skúli mennski og hljómsveit fagna heimsókn Þorleifs Gauks Davíðssonar til landsins með því að spila bullandi blús og búgítóna á Ob La Di, Frakkastíg 8. Gleðin hefst kl 23:00 og það kostar ekki nema smápeninga inn. Það er að segja þúsund krónur. Ekki missa af Rónablúsnum, Skjálvandi skilvitablúsnum og tregablöndnum Tilvistarspekiblúsnum.

 

The Wicked Strangers, Dorian Gray, RetRoBot og Caterpillar Man koma fram á Bar 11. Húsið opnar klukkan 21:00 og það er ókeypis aðgangur.

 

 

 

Laugardagur 26. október

 

Bresku böndin THE ACTIVATORS og KILL PRETTY spila á Gamla Gauknum ásamt Caterpillar Man, Fivebellies og Dýrðinni. Tónleikarnir hefjast klukkan 22:00 og það kostar 1500 kr inn.

 

Hljómsveitin Brain Police verða með tónleika á Bar 11 í beinni útsendingu á Rás 2 í þættinum Luftgítar. Útsendingin byrjar klukkan 19:30 og stendur til 22:00. Hægt að fá boðsmiða með því að hlusta á Rás 2.

James Holden og Bonobo á Sónar

Mynd: Squarepusher á síðustu Sónar hátíð.

Í morgun var tilkynnt um fleiri listamenn sem hefur verið bætt við dagskrá Sónar hátíðarinnar í Reykjavík. Þar ber þar hæst breska pródúsantinn og plötusnúðinn James Holden, raftónlistarmanninn Bonobo frá sama landi, þýska plötusnúðinn Paul Kalkbrenner og Starwalker, samstarfsverkefni Barða Jóhannssonar og J.B. Duncel úr Air. James Holden hefur vakið mikla athygli bæði fyrir eigin tónlist og einstakar endurhljóðblandanir og varð geimdiskó endurgerð hans af The Sky is Pink að miklum danssmelli, hér heima og erlendis, fyrir um 10 árum. Þá hefur hans nýjasta plata, The Inheritors, hlotið frábærar viðtökur þar sem hann blandar súrkálsrokki, sveimhljóðum og kosmískum áhrifum saman í dáleiðandi tekknósúpu.

Bonobo hefur í yfir áratug verið á mála hjá hinni virtu Ninja Tune útgáfu og gefið út frábærar plötur af flóknu og útpældu trip hoppi og ber af óragrúa tónlistarmanna í sama geira. Paul Kalkbrenner er goðsögn í þýskri klúbbamenningu og lag hans Sky and Sand úr kvikmyndinni Berlin Calling varð stórsmellur á öllum helstu klúbbum Evrópu. Starwalker er nýstofnuð hljómsveit Barða Jóhannssonar úr Bang Gang og J.B. Duncel úr hinni frönsku Air en þeir gáfu út sitt fyrsta lag og myndband fyrir skemmstu og er stuttskífa á leiðinni. Sónar-hátíðin fer fram í Hörpu 13.-15. febrúar næstkomandi en fyrir skemstu var tilkynnt að Major Lazer yrðir aðalnúmerið á hátíðinni en lista yfir staðfesta listamenn má finna hér. Fyrsta Sónar hátíðin í Reykjavík var haldin í febrúar á þessu ári og umfjöllun straum.is um hana má lesa hér. Hlustið á fleiri tóndæmi hér fyrir neðan.



Airwaves yfirheyrslan: Snorri Helga

Snorri Helgason spilaði á Iceland Airwaves fyrst árið 2006 með hljómsveit sinni Sprengjuhöllinni en síðan þá hefur hann komið fram á hverri einustu hátíð. Snorri gaf nýlega út hina frábæru plötu Autumn Skies en hann mun flytja efni af henni á hátíðinni i ár.

 

Hver var fyrsta Airwaves hátíðin sem þú fórst á sem gestur og hvað var eftirminnilegast á henni?

Ég held að fyrsta og eina skiptið sem ég hafi farið á Airwaves hafi verið 2005 eða 4 þegar það var í Laugardalshöll að mestu leyti. Fatboy Slim og eitthvað sjitt (2002). Svo hef ég spilað á hverri hátíð síðan 2006.

 

Hvernig var þín fyrsta upplifun af því að spila á Airwaves? 

Ég spilaði fyrst á Airwaves 2006 með Sprengjuhöllinni á Grand Rokk. Það var ógeðslega gaman. Þetta voru kannski okkar 7-8 tónleikar eða eitthvað svoleiðis. Við vorum bara nýbyrjaðir og sumir okkar eiginlega nýbyrjaðir að spila á hljóðfærin sín. En við höfðum hjartað á réttum stað og það skilaði sér og það var mega stemmning.


Á hversu mörgum hátíðum hefur þú spilað?

2006-2013. Þetta verður þá mín áttunda.

 

Hvað eru eftirminnilegustu tónleikarnir sem þú hefur sótt sem gestur?

FM Belfast á gamla Gauk á Stöng líklega á Airwaves 2007. Djös stemmning.

 

Hvað eru eftirminnilegustu tónleikarnir sem þú hefur spilað á sjálfur?

2008 spilaði Sprengjuhöllin á Lúdó sem var í kjallaranum þar sem Bónus er núna á Hallveigarstíg. Þetta var hellað venue og svona frekar mikill fermingarveislufílingur yfir öllu. Það vantaði bara heitu brauðréttina og nokkrar ömmur. Ofan á allt þetta var ég alveg fáránlega veikur þennan dag og spilaði allt giggið eiginlega í algjöru óráði. Í síðasta laginu hneig ég næstum því niður en náði að styðja mig við magnarann minn. Staulaðist heim alveg gjörsamlega búinn á því. En þetta var gott gigg.

 

Hvernig finnst þér hátíðin hafa breyst og þróast í gegnum árin

Bara til hins betra. Allt skipulag og allt utanumhald er orðið miklu miklu betra. Það er bara allt annar fílingur yfir þessu núna en fyrir nokkrum árum. Miklu meira pottþétt og pro og þá er þetta allt saman miklu skemmtilegra.

 

Hvað er uppáhalds tónleikastaðurinn þinn?

Á Íslandi er það líklega Græni Hatturinn á Akureyri og Sjóræningjahúsið á Patreksfirði. En ef ég á að velja eitthvað Airwavesvenue þá er það pottþétt Gamla Bíó.

 

Hefurðu einhver góð ráð handa tónlistarmönnum sem eru að spila á Airwaves í fyrsta skiptið?

Passið upp á að hvíla ykkur og heilsuna. Í alvöru. Þetta er djös törn og mikið álag á líkamann. Farið í sund og reynið að borða eins vel og getið. Ekki bara pullur og börrar. En auðvitað verðiði að njóta líka. Þetta er gaman.

 

Hverju ertu spenntastur fyrir á hátíðinni í ár? Erlent/innlent?

Yo La Tengo. Ekki spurning.

 

Hvaða þýðingu hefur Iceland Airwaves fyrir íslensku tónlistarsenuna?


Mjög mjög mikla. Þetta er algjör vítamínsprauta fyrir senuna alla.

 

 

Hvaða beinu áhrif hefur hátíðin haft fyrir þig og þína hljómsveit/hljómsveitir?

Ég fann útgefanda á Winter Sun á GAS-svæðinu á hátíðinni 2011 sem gaf hana svo út ári seinna. 2012 vorum við bókuð á Eurosonic og fundum synch-agent í LA sem hefur reynst okkur vel. Svo hef ég kynnst fullt af góðu fólki sem hefur hjálpað mér í gegnum tíðina með alls konar smáatriði og tengingar og plöggerí.

 

Hvað hefur þú spilað mest á mörgum tónleikum yfir eina hátíð?

13 stykki árið 2011. Það var assskoti mikið.

 

Uppáhalds Iceland Airwaves hátíðin þín í gegnum árin? Af hverju?

2012. Hún var bara einhvern veginn svo drullu næs. Þær verða einhvern veginn alltaf betri með hverju árinu. Ég hlakka mikið til að sjá hvernig þau ætla að toppa sig í ár. Engin pressa samt.

 

Kraftwerk eða Yo La Tengo?

Yo La fökkkings Tengo baby.

 

 

Listasafnið eða Harpa?

Harpa. Alla leið í bankann.

 

Með hvaða hljómsveit/hljómsveitum ertu að spila á þessari hátíð og hvar er hægt að fylgjast með þér?

Ég er bara að spila með SnoHe flokknum. Tvisvar on-venue með hljómsveitinni og svo 4 sinnum off-venue. Það er best að fylgjast með okkur á Fésinu: www.facebook.com/helgasonsnorri

 

Ljósmynd: Jónatan Grétarsson. 

Airwaves yfirheyrslan M-band

 

Hörður Már Bjarnason spilaði á 14 tónleikum á sinni fyrstu Airwaves hátíð í fyrra. Hörður kemur fram ásamt verkefni sínu M-Band í ár auk þess að spila á trommur með Nolo og ljá Tonik rödd sína. 

 

Hvernig var þín fyrsta upplifun af því að spila á Airwaves? 

Ég spilaði fyrst í fyrra með M-Band, Tonik og RetRoBot, en það var líka í fyrsta skipti sem ég fór á Airwaves almennt. Það var allt mjög framandi og skemmtilegt. Orðið “hátíð” lýsir Airwaves mjög vel. Það verður einhver spenna og gleði í loftinu og að fá að taka þátt í þessu öllu saman er mikil gleði og heiður.

 

Hvað eru eftirminnilegustu tónleikarnir sem þú hefur sótt sem gestur?

Eftirminnilegustu tónleikarnir sem ég hef farið á voru sennilega Doldrums og Dirty Projectors í fyrra. Ég hafði ekkert hlustað á eða kynnt mér þessa artista svo það kom mér sérdeilis á óvart hvað sett þeirra voru ótrúlega flott, teknísk og þétt. Atvik þegar trommari reif bassatrommuskinn á snarbrjáluðu setti. Ben Frost var líka mjög skemmtilegtilegur.

 

 

Hvað eru eftirminnilegustu tónleikarnir sem þú hefur spilað á sjálfur? 

Þeir hafa allir verið eiginlega alveg frábærir og eftirminnilegir. M-Band í Hressingarskálanum var eftirminnilegt útaf því hvað það var mikið af fólki sem komst í þetta tjald sem þar var, og magnað að það sé hægt að hafa útitónleika í svona vondu veðri eins og var þá. Eins með RetRoBot á smekkfullu Dillon, þar var sérlega góð stemning.

 

 

Hvað er uppáhalds tónleikastaðurinn þinn?

Ég er ekki alveg viss. Mér þykir mjög vænt um þá flesta. Þeir eru þó misjafnir eins og þeir eru margir.

 

 

Hefurðu einhver góð ráð handa tónlistarmönnum sem eru að spila á Airwaves í fyrsta skiptið?

Æfa vel, skipuleggja tímann vel, borða og sofa vel og svo bara njóta þess að vera til og spila! Það er kannski ekkert brjálæðislega mikið rokk í þessu en þetta heldur mér að minnsta kosti í elementinu mínu…

 

 

Hverju ertu spenntastur fyrir á hátíðinni í ár? Erlent/innlent?

Omar Soleyman, Jon Hopkins, Emiliana Torrini og Anna Von Hauswolf. Ég hefði mikið viljað sjá Gold Panda líka en hann skarast við Jon Hopkins.

 

 

 

Hvað hefur þú spilað mest á mörgum tónleikum yfir eina hátíð?

Fjórtán tónleikum. Ég spila að öllum líkindum á fjórtán tónleikum í ár líka.

 

 

 

Kraftwerk eða Yo La Tengo?

Bara bæði betra..

 

Listasafnið eða Harpa?

Mér finnst báðir staðir mjög flottir. Það er þó töluvert betra hljóð í Hörpunni auk þess sem hún er fínn staður fyrir gott chill á milli tónleika. Í vonda veðrinu í fyrra var bara mest næs að vera í Hörpunni og rölta á milli sala.

 

 

Með hvaða hljómsveit/hljómsveitum ertu að spila á þessari hátíð og hvar er hægt að fylgjast með þér?

Í ár spila ég með M-Band, Nolo og Tonik. M-Band verður á Harlem á föstudagskvöldinu, Tonik á Harlem á miðvikudagskvöldinu sem og Nolo en Nolo verður svo aftur í Listasafninu á laugardagskvöldinu.

 

 

Eitthvað sem þú villt koma á framfæri að lokum?

Fyrsta breiðskífa M-Band er að koma út! Fylgist með!